MIRI: Polis Sarawak deka beratika baru chara ke patut atur ungkup pemesai pansik (IO) dianjung gawa ba menua ulu dikena ngenegapka agi operasyen sereta ngemuntang mensia mayuh ngeripot aktiviti penyalah ba kandang menua nya.

Sapit Kepala Polis Sarawak, Datuk Dev Kumar M.M Sree madahka sekeda endur ba Sarawak nadai pemesai pansik baka ba Balai Polis Bario laban pemesai nya diasuh gawa ba Indu Opis Polis (IPD) Pelilih Marudi ti begunaka 16 jam ngambi sampai ba endur nya enti ngena perengka pengangkut darat.

“Mensia mayuh ulih ngaga ripot polis ba Bario tang pemesai pansik diasuh gawa ba IPD Marudi napi pemar jalai darat pengelama 16 jam ketegal deka mendingka penerang sida,” ku iya ngagai pemberita pengudah Randau Nagang Penyalah, ditu ensanus.

Dev madah, kelimpah ari Baram, Balai Polis Pelilih Bekenu mega nadai pemesai pansik laban diasuh gawa ba IPD Miri iya nya urung sejam jalai darat ari Bekenu.

Lebuh bejaku, iya ngelansa pekara nya berindik ari berita ngerimbas pending pasal siku raban polis gawa maya mabuk ba Bekenu.

Iya mega minta mensia mayuh ngambi ngeripot sebarang pekara bekaul terus ngagai iya enggau naka pengelengkas.

“Aku begunaka tiga pekara ti diguna iya nya haribulan, jam enggau endur nyadi enti deka ngeripotka pekara nya ngagai aku ngambi ulih dipansik silik,” ku iya.