KUCHING: Kunteriktor Bumiputera sigi enda dikelaung dalam bejalaika projek perintah sekalika projek besai tauka projek mit nyengkaum Projek Transfomasyen Menua Pesisir (RTP).

Sapit Kepala Menteri Datuk Amar Douglas Uggah Embas madah, urung 30 peratus ari kereja komponen diungkup ngagai kunteriktor Bumiputera ungkup projek besai baka jalai tebing tasik, Jalai Besai Kedua enggau sekeda pakej besai Program Grid Bekal Ai Sarawak.

Pia mega, ungkup projek berega kurang ari RM100,000, Uggah madahka projek tu ungkup kunteriktor Bumiputera Kelas F ti bisi ngerejister enggau Unit Pengerejister Kunteriktor enggau Juruperunding Nengeri (UPKJ).

Nambahka nya, ungkup projek berega lebih RM100,000, Uggah madahka 30 peratus ari agih pemansang ninting taun semina diungkup ngagai kunteriktor Bumiputera rejister enggau UPKJ aja.

Kelimpah ari nya, ungkup RTP, Uggah ti mega Menteri Wang Kedua madahka projek tu ungkup kunteriktor Bumiputera ti rejister enggau UPKJ aja.

“Batang tuju program khas tu dikena nyendiaka peluang ngagai kunteriktor dalam pelilih menua enggau bagi menua ngambi bagi dalam pemansang menua.

“Taja pia, kunteriktor Bumiputera meseti diaku chara teknikal enggau wang dikena nyereta projek nya nentuka projek mujur dipejalai,” ku iya lebuh nyimpul jurai Opis Wang Kedua beserimbai enggau Aum Besai Kaunsil Nengeri (Dun), ditu ensanus.