KUCHING: Ba Beting Maro, zon pemansang aktiviti betanam betupi dibagi nengah chara strategik dikena nentuka genturung pendiau dia ulih nyapai pemujur dalam projek tibang pemakai Betong-Sarikei.

Adun iya, Razaili Gapor madah, nya kebuah peranak ba kandang menua Beting Maro meseti nyukung Perintah dipegai Gempung Parti Sarawak (GPS) kelimpah nulak Perintah Pakatan Harapan (PH) ngambika agenda pemansang aktiviti betanam betupi ulih dijapai.

Ku iya, ba renggat tumu suba Kepala Menteri Datuk Patinggi Abang Johari Tun Openg udah meri agih belanja RM10 juta dikena ngemansangka sistem entail ai khas projek nanas ba Sungai Beras ke benung dipejalai diatu.
“Nya alai, kitai deka minta agih belanja ti sama ungkup kandang menua enggau ngarapka Perintah Sarawak meri mayuh agi skim betanam betupi bukai,” ku iya nerang.

Iya mansutka jaku nya lebuh ngintu Pengawa Diligit GPS Renggat Baruh ari Zon Lima ti deka bemalam di BCCK ungkup konvensyen keterubah GPS pengudah ditumbuh, ditu kemari.

Nambahka nya ku iya, pekara tu beguna amat nentuka agenda Beting Maro nyadi bakih projek tibang pemakai Betong-Sarikei mujur dipejalai.

Jelasnya, ini penting bagi memastikan agenda menjadikan Beting Maro sebagai rakan aktif projek bakul makanan Betong-Sarikei.

“Ambika banding, nanam nyiur ungkup kandang menua Semarang, Spinang enggau Beting Maro mega disukung nengah ngasilka produk minyak kelapa dara (VCO) enggau kokopit.

“Nanas mega ulih dikemansang ngagai kandang menua Sungai Murok, Beras, Teruk enggau Lamun ke alai diatu manggai 400 ikar udah ditanam.

“Kandang menua Tambak deka dipejalai projek Taman Industri Apong lalu kami deka taman tu nyadi chunto pemadu manah ungkup industri gula apong.

“Semua tu patut dikemanah infrastuktur pemun iya lalu peranak dia dipinta bekerejaama enggau Perintah GPS.

“Aku andalka kitai ba Dun Beting Maro ulih nyapai perambu enti sema kitai ngaul diri ngemansangka pekara ti patut.

Nambahka nya ku Razaili, Perintah PH meseti ditolak enggau enda ulih dikeandal ngemansangka projek tu.

“Kebuah pia, sida semina mayuh kelikuh kelimpah nginsil enggau nangguhka mayuh projek ungkup Sarawak ti udah dikemendar sebedau tu,” terang Razaili.