KUCHING:  Jaku ti dipansutka Kepala Menteri Datuk Patinggi Abang Johari Tun Openg maya Konvensyen Gempung Parti Sarawak (GPS) 2019 nyemetak bendar meri fokus ngelantang pendiau rayat sereta ngetanka hak ti endang ungkup menua Sarawak.

Ketuai Indu Parti Rakyat Sarawak (PRS) Datuk Seri Doris Brodie madahka semua fokus perintah GPS endang bepelasarka undang-undang ti betul.

“GPS endang chakah ngatur pemansang ungkup nengeri Sarawak kelebih agi meri fokus ngagai infrastruktur menua pesisir baka perengka penyambung, jalai alun, bekai ai, bekal karan enggau ke bukai.

“Semua inisiatif tu dipelaba deka dijapai ba Sarawak sereta nyadi chunto nengeri bukai di Malaysia manggai taun 2030,” ku iya.

Doris bejaku munyi nya lebuh ditanya pemberita di Palan Aum Borneo Kuching (BCCK) ditu, pagi tadi.

Ku iya, Abang Johari madahka rayat patut meri komitmen sereta beserakup ngambika ulih nyamin visyen enggau objektif GPS dijapai.

“Sarawak meseti belajar ngatika diri laban kitai enda ulih bepanggai ngagai Perintah Besai (Pakatan Harapan) agi.

“Kebuah pia, kenyau pengelama sida megai perintah Perintah PH dipeda enda adil ngagai Sarawak,” ku iya.