KUCHING: Inisiatif ti dipejalai Gerempung Bansa Dayak Bidayuh (DBNA) mujur mantu mutarka laya isu pasal tanah adat (NCR) ba sitak Bidayuh.

Adun Tasik Biru, Datuk Henry Harry Jinep madah, isu tanah NCR tu enda bangat tusah tang nyau nyadi kereban politik.

Kenu ku iya, isu tanah NCR suah nyadi isu ba rayat menua pesisir lebih agi bansa Dayak.

Iya madah, inisiatif DBNA ke dipejalai kenyau 2007 dikena mutar penanggul adan enggau orang bukai ba sitak Bidayuh.

Kenu ku Henry, pengawa nyukat kelinggi ba sitak Bidayuh ngena perengka teknologi GPS betuju ngelai tanah enggau adan NCR sida ke ngaga peminta.

Tandu iya, pengari rayat Bidayuh enda dikemendar masuk champur bekaul enggau inisiatif nya.

“Taja pengawa nyukat kelinggi tu enda 100 peratus ngena, tang atur baka tu ngemuntangka orang ti beempu tanah NCR ngelala adan enggau pangan diri.

“Inisiatif tu ngemuntangka sida ngelai tanah, endur enggau adan entara tanah NCR enggau pangan diri,” ku iya rambau randau bekunsi penemu beserimbai enggau Konvensyen GPS ba Palan Aum Borneo Kuching (BCCK) lemai tadi.