BALINGIAN: Kaunsil Pelilih Dalat enggau Mukah (MDDM) ngangkatka menua Balingian nengah pengelebih pemansut sungai baka undang.

MDDM bekerejasama enggau Komiti Genturung Pendiau (JKP) Zon Balingian deka ngatur Pengerami Padaq tauka Pengerami Undang kena 30 November tu ba Tebing Batang Balingian ditu.

Mensia mayuh diperansang sampal datai ngerichahka agi pengerami keterubah diatur ba pelilih menua tu.

Kenu ku Penyelaras Opis MDDM Zon Balingian, Adeni Narawi, batang tuju sida deka ngelakuka Balingian nyadi menua ti tebilang enggau undang.

“Asai isi undang ke bisi ba Balingian tu bebida enggau undang menua bukai sereta macham chara mela iya.

“Enti ditu, kami bisi mi undang, asi undang enggau bansa pemakai bukai ti disumai ngena undang.

“Pengerami tu mega kena matak mayuh agi temuai datai kitu ngasaika pemanis isi undang kelimpah ngayam pemanah rampa menua Balingian,” ku iya lebuh dirandau Suara Sarawak.