KUCHING: Pengawa numbuhka Komiti Pengatur Genturung Pendiau Perintah Besai (MPKKP) di menua tu terus nerima bantah ari rayat renggat baruh.

Sekali tu, Komiti Pemansang enggau Pengelikun Genturung Pendiau (JKKK) Kampung Haji Baki Blok C betuaika Ketua Kampung Rosli Ahmad Darus mantah MPKKP laban ku penemu sida komiti nya deka ngasuh penyerakup rayat pambar.

“Sempama baka rumah enti bisi dua iku ketuai, ni tau begulai.

“Tu semina main politik ti deka ngasuh peranak Kampung Haji Baki pambar,” ku iya madah nyemetak.

“Adun (Lo Khere Chiang) ti megai kami diatu udah chukup mentas sereta gerah jari meri bantu, seruran datai ngabas sereta nyukung sebarang pengawa dikereja kami.

“Ngelama tu kami endang ngasaika penyamai dipegai GPS. Nembiak redak mega andalka GPS megai perintah enggau mai pemansang,” terang iya seraya mantaika kain rentang mantah MPKKP begulai enggau bala bukai ditu, tadi.