“Nitihka pansik ‘Sarawak Museum Journal’ periuk tanah kitai nya endang amat bisi lalu sebaka enggau periuk tanah ti ditemu ba Gua Niah.”

KUCHING : Periuk tanah iya nya sebengkah agi pesaka identiti bansa Iban ke nyau jarang dipeda kemaya hari tu.

Beduduk ari nya, Ketuai Asadia Mabong Unggang madah, kitai (Iban) patut ngibun sereta belajar nempa kraf jari periuk tanah tu ngambika iya enda punas.

“Asadia mega deka ngatur kelas ngaga periuk tanah, laban nya endang pesaka asal bansa kitai.

“Nitihka pansik ‘Sarawak Museum Journal’ periuk tanah kitai nya endang amat bisi lalu sebaka enggau periuk tanah ti ditemu ba Gua Niah.

“Nya alai kitai patut ngembuan tauka belajarka chara nempa keresa pesaka periuk tanah nya,” ku iya seraya madah Kelas Ngaga Periuk Tanah tu diperambu deka diatur tengan taun 2020 ila.

SIRUKA ADAT LAMA…Asadia terus chakah ngangkatka main asal Dayak, pun bulan Nov tu tadi sida udah muka kelas betabuh lalu bisi nerima enam iku nembiak baru. Pengawa tu betuaika Pengajar Betabuh Asadia, John Nuga (empat kanan). Bela dipeda Mabong (empat kiba) enggau bala nembiak kelas betabuh.

Mabong madah munyi nya nengah sebengkah penerang ke dianjung ngagai Ruai, Suara Sarawak ditu, apin lama ke udah.

Ngelansa pasal kelas ngaga periuk tanah tu, Mabong madah iya deka diatur Asadia begulai enggau Kaunail Kraft  bepalan ba Kraftangan Malaysia Pampang Sarawak.

Tambah mega pansik pasal DNA rangkah pala ba Gua Niah ti beumur 37,000 taun madahka DNA sida nya sebaka enggau DNA kitai Iban.

Pansik tu diaduka sebuah Universiti di Australia.

Ngelansa pasal pesaka periuk tanah tu dia kitai kala ninga iya disebut dalam rintai leka main Iban ti munyi tu ; “…Pechah ‘periku tanah’ ganti periuk tani, Padam bulan diganti matahari, Parai orang ke tuai ganti tubuh kami, Pambu orang ke dulu ganti kami ke dudi”.

Nyadi tu siti agi bukti ngelai periuk tanah tu endang amat sebengkah ari pesaka lama bansa Iban ke kala dikembuan lalu nyau jarang dipeda tauka dikumbai punas kemaya hari tu, ku tandu Mabong.