“Taja perintah Pakatan Harapan (PH) penapat bekimpin, nyentuk besemaya ngaga projek bejuta-juta, tang ‘umpan’ nya agi enda ngasi.”

KUCHING: Semua udah ngadang, chalun Barisan Nasional ba Pengawa Bepilih Mit (PRK) Tanjung Piai, Johor, Datuk Sri Wee Jeck Seng menang tang penyampau majoriti undi enda baka disangka.

Ba penemu Kaban Kunsil Nengeri (Adun) Engkilili Dr Johnical Rayong Ngipa, pemutus nya enda datai ba runding baik nya pemerati politik tauka bala pemesai parti BN.

“Taja perintah Pakatan Harapan (PH) penapat bekimpin, nyentuk besemaya ngaga projek bejuta-juta, tang ‘umpan’ nya agi enda ngasi,” pia ku iya madah meri banding pemutus PRK nya, kemari.

Dr Rayong ke mega Ketuai Nembiak Parti Sarawak Bersatu (PSB) madah, pemutus nya mandangka ‘chura’ politik diatu udah jauh berinsur laban ku iya, bala pengundi diatu udah jera ninga semaya bemacham bengkah projek tauka bantu.

Semua nya ku iya, ukai nyadika terabai matak undi rayat.

“Pia mega, mayuh pekara bukai ngasuh pemutus tu nyadi lebih agi rayat lama nganti bemacham danji tauka manifesto PH alu empai dipenyadi.

“Ukai semina nya, rayat udah meda baka ni chara PH nyadi perintah diatu,” ku iya madah baru.

Iya madah, nama ke nyadi ba PRK Tanjung Piai nya tau bendar betandu baru ba Pengawa Bepilih Nengeri (PRN) ditu nangkan ke tu ila.

“Pekara tu bepun ari kuing ‘Tsunami’ politik ti benung nyadi diatu,” ku iya madah nyemetak.