“Sarawak deka mansang nyadi menua Estonia ba wilayah Asia Tenggara.” – Abang Johari

KUCHING: Kepala Menteri Datuk patinggi Abang Johari Tun Openg madah, dua buah sepital entarabansa deka didirika di Tabuan enggau Kuching lalu diatu benung ba renggat randau.

“Kompeni entarabansa deka bejalaika dua bengkah sepital tu ila.

“Sepital tu ila mega deka diungkup ngagai penyakit riman enggau penyakit baru ke bukai,” ku iya.

Abang Johari madah munyi nya lebuh dirandau pemberita pengudah bejadika Opis Sarawak Multimedia Authority (SMA) di SMA Creative Heritage Innovation Centre (CHIC), Jalai Masjid ditu, tadi.

Iya madah, tu berindik ari Sarawak deka ngena enggau ngemeranka teknologi virtual reality ba pengawa nyaga pengerai.

“Reti iya, Sarawak sedia nerima dagang temuai ba pengawa nyaga pengerai.

“Sarawak deka mansang nyadi menua Estonia ba wilayah Asia Tenggara,” ku iya.

Ku iya, Perintah Sarawak deka ngemanahka pekara virtual reality dalam nyendiaka pekara ti ngena ngagai pengawa nyaga pengerai.

Apin lama ti udah rambau Sidang Kemuncak kesihatan Mudah Alih Digital Asean 2019, Abang Johari madahka Sarawak seruran komited dalam dunya teknologi kelebih agi dalam teknologi digital industri pengerai.

Ku iya, aum besai nya siti ari chara nambahka mai kitai sedarka pemansang industri pengerai nengah kaul entara menua Asean.