KUCHING: Sistem Pansik chara terit (agresif) agi deka dikemeran Polis Diraja Malaysia (PDRM) Kontinjen Sarawak dikena nagang penyalah menua tu.

Kepala Polis Sarawak, Datuk Ramli Din madahka semua opis enggau pampang pansik menua patut ngena chara tu maya bejalaika pansik enggau neritka atur.

Ku iya, penyalah mungkur semua pekara indeks enggau ukai indeks nyengkaum sarang judi, dadah, ulah ti kamah patut ditagang bepelasarka undang-undang.

“Semua pengawa nagang penyalah tu patut seruran dipejalai, nipakka pangku pengawa raban polis ngambika orang ti ngereja penyalah ulih ditemu lalu dibai ngagai kort, nerima ukum ke patut.

“Udah nyadi tanggungpengawa kitai nyaga pengelikun mensia mayuh ari sebarang penyalah enggau pengawa ti tau ngeruga pengelantang semua,” ku iya.

Iya mansutka jaku nya lebuh bejaku ba Pengawa Bebaris Khas Randau Keterubah begulai enggau polis Kontinjen Sarawak di Padang Kawad Indu Opis Kontinjen (IPK) Sarawak, pagi tadi.