KUCHING: Penyelai buah pua kumbu dikembuan bansa Iban nyadi pengelebih diangkat nyadi pesaka rama dunya.

Siku anak Iban ke ngempu chap dagang Lentera Astana, Christopher Anthony Ikus madah, buah pua kumbu ti ngemai kelai bansa Iban enggau penuduk siku-siku chukup manding dipeda sereta narit ati kelebih agi ngepan asal.

Ku Chirstopher tauka teleba agi dikangau Chris, penyelai enggau pengulih besai tu meri peransang ngagai iya ngangkatka buah pua kumbu nyadi siti gaya pekayan ngagai renggat entarabansa.

“Pengudah pua kumbu tu nyadi gaya pekayan, iya ulih nyadi siti tukoh chukup manding dirasuk, tampak eksklusif.

“Pemanah tempa enggau setail mega ulih narit ati mensia mayuh baik ba menua tu tauka menua luar,” ku iya.

BUAH PUA KUMBU… Keranjai jari Chris nunda buah pua kumbu.

Lebuh dirandau Suara Sarawak, Chris madahka pua kumbu ukai semina ulih dikena bansa Iban aja, tang mega bansa bukai.

“Lebuh keterubah nyereta panggau mandangka gaya pisin rambau Malaysia Wedding Festival di Shah Alam Convention Center, aku beratika pua kumbu tu nerima mayuh perati ari mensia mayuh.

“Tu siti pekara ti chukup ngemegahka ati laban ukai kitai aja rinduka buah pua kumbu, tang bansa bukai mega tekait ati,” ku iya temegah.

Berindik ari pengeransing iya ngangkatka pesaka rama nya, Chris nerima mayuh peminta ari orang ke meli ti dekaka setail pekayan ti bisi buah pua kumbu.

Peranak asal Kanowit tu sereta ngembuan degree Komunikasi Multimedia udah ngaul diri dalam industri pisin pengelama sepuluh taun lalu diatu ulih temegah sama penuduk seikas penengkebang pisin bukai industri nya.

MANDING… Siti ari keranjai jari Chris ke narit ati pengemeran industri pisin.

Entara penyulut udah dikeulih Chris dalam industri pisin iya nya Champion Piala Seri MFEA 2014 di Shah Alam, Sarawak Awards Fashion Designer 2016, Malaysia Fashion Weeks 2016 Kuala Lumpur, Alta Moda 2019 enggau Designer Showacase 2019 sereta Sarawak top Achievers 2019: Leadership Excellence In Fashion Design and Makeup Artisry.

“Aku ukai semina rindu sereta angkunka buah pua kumbu kitai, tang mega Pro Makeup Artist tauka ngantaka orang lalu mayuh peneleba ba pengawa tu.

“Taja mayuh pemar, macham utai ke nekul, genap penanggul ditapi dalam industri tu tang semua nya nyadika peransang aku nyingkang jauh agi nitihka singkang orang ke udah dulu mujur.

“Ukai muntang alai kitai deka nengkebang langkar gaya tauka pisin pekayan nangkup 100 peratus pinta mensia mayuh ke meli.

“Nya alai, kitai ti nyadi penengkebang chura sereta ngelangkar patut sedia meri enggau nerima penemu, buah runding enggau inovasyen ari langkar kitai nya,” terang iya.

Macham ulah mensia enda disadang kitai dalam industri tu laban genap iku kitai tentu mega ngembuan ulah sereta pinta ke enda sama, ku Chris.

Ari nya ku Chris, iya patut liat ati sereta puh lebuh begulai enggau nangkup peminta bala klien nadai ngira ngaul pisin tauka dagang.

Pia mega ku iya, tiap ringkat kereja nengkebang langkar dataika nyadi pekayan, kitai enda tau enda nentuka asil tengkebang ngembuan kualiti berengkah ari ‘pattern-making’, nguntin, milih bansa kain, mandingka chura ti engkeman, nyait enggau ke bukai.

“Pengelama 10 taun dalam industri tu, kenang besai semampai dikingat lalu enda ulih dibuai aku iya nya lebuh nyereta Fashion Designer Piala Seri MFEA 2015.

“Pagila kami ke bepekit, malam sebedau nya zip baju (dress) ke ditengkebang aku enggai enda jai.

“Lebuh nya suba apin bisi Grab, tang ketegal keran deka mutarka penanggul nya, sanggup aku nepan teksi ari Shah Alam ngagai rumah kaban aku di Ampang taja tambang mar,” ku iya nusi madahka pengesal ati diri.

Seninjik amat lebuh hari bepekit nyadi Chris dipadu menggi gelar champion lalu tu ngangkatka nama iya enggau menua Sarawak ba dunya pisin.

Ditanya pasal pemujur pengawa iya diatu, Chris madahka diri udah mindah ngagai Miri lalu ngembuan sebuah kedai gari tauka butik.

“Taja aku udah mindah ari Kuching ngagai Miri, tang aku seruran berundang ngagai Kuching enggau Semenanjung betemu enggau klien.

“Sekeda ari klien mendam aku endang semampai begunaka servis aku nyadi penengkebang pisin sida,” ku iya.

Chris madahka iya baru udah tembu enggau panggau pisin di Kompleks Muzium Sarawak ke alai iya mandangka pisin ti ditibak iya ari Jawang Iban.

“Diatu jeman ekonomi digital. Mensia mayuh kurang meli enggau chara datai terus ngagai butik tang rindu agi ngena online.

“Nya alai, aku ngasaika dagang ngena pelasar ekonomi digital tu ulih dikerembai lalu ngemansangka dagang enggau nadai sekat, makit mega deka besai agi,” ku iya.

Mayuh aplikasyen online ti nyendiaka servis ke ulih diterima semua enggau nadai tatak laban semua pengawa ulih dikereja semina ngena tunjuk jari aja.

“Tu mih peluang aku mandang ngagai menua luar pasal pengelebih enggau pemanah keranjai jari aku ditibak ari penyelai buah pua kumbu kitai.

“Juluk aku endang besai, mai pesaka bansa kitai tu meraka tasik besai, nengkilah remang dataika dikelala komuniti dunya.

“Tu mega mantu aku ngangkatka asil pengelandik jari baka tenun pua kumbu lalu ngerembaika indusri pisin Sarawak,” ku iya nyimpul randau.