KUCHING: Chairman Parti Keadilan Rakyat (PKR) sitak Selangau Joshua Jabeng dipinta minta ampun ngagai Menteri Kereja Raya ti mega Chairman Kaunsil Ketuai Nengeri (MPN) PKR Sarawak Baru Bian.

Ba siti penerang media ensana, Mandal Ketuai Pampang enggau raban komiti Sitak Selangau nyengkaum pati Kakus enggau Tamin peminta tu berindik ari ulah Joshua ti deka muai Baru ari nyadi Chairman MPN PKR Sarawak.

Ku sida, sebedau tu Joshua enggau terang madahka 18 ari 30 raban pampang parti sepenemu deka muai penuduk Baru ari nyadi ketuai MPN.

Sida madahka enda setuju enggau ulah Joshua laban nyemetak pengawa nya dipeda ngembuan agenda kediri.

Tandu sida, kenyau Pakatan Harapan (PH) megai Perintah Besai, Joshua bisi madahka diri asa ketegal nadai diberi penuduk ti patut bagi Kaban Parlimen nya di Selangau.

Kelimpah ari nya, sida madahka pengawa Joshua udah enda nitihka atur parti ke alai sida ngasuh iya minta ampun ngagai Baru.

Ku sida, nyema Joshua enda minta ampun ulah iya deka diripot ngagai Komiti Disiplin PKR.

Pia mega, sida ketuai akar umbi ari Selangau meri sukung penuh ngagai Baru nyadi Kaban Parlimen Selangau sereta temegah laban Baru ari Sarawak dichiri nyadi siku menteri ba Perintah Besai.

Sempekat nya ti diuluka Mandal Ketuai Pati Simon Joseph sereta lima agi sida ke bukai lalu disukung bala ranting Selangau bisi empat iku enggau ranting Tamin enggau Kakus bisi enam iku.