KUCHING: Pengawa ngagai Jematan Batang Rambungan deka ngemuntangka pejalai pengelama 30 minit enti nengah jalai tebing pantai ari Kuching tauka Santubong ke Lundu.

Kaban Parlimen Santubong, Datuk Seri Wan Junaidi Tuanku Jaafar madah, pengawa ngaga jalai raya tu deka ngujungka produk-produk digaga mensia mayuh muntang dianjung ngagai Kuching laban nadai agi bepanggai ngagai servis feri.

“Tambah mega, nya deka ngurangka tating pengidup enti beratika ungkus kereban pengangkut ti semina ngena entukar.

“Tu deka ngemuntangka peranak ari sitak Lundu nurun gawa ke Kuching ulih pulai hari laban jam nurun gawa udah jimat,” ku iya maya dirandau Suara Sarawak kemari.

Tandu Wan Junaidi, perambu ngaga Jematan Batang Rambungan dikenataika ex-Kepala Menteri, niang Pehin Sri Adenan Satem ba taun 2015.

Datuk Seri Wan Junaidi Tuanku Jaafar

“Ukai semina besambungka sitak Matang ari Kuching tang mega ngagai genturung pendiau ba Sampadi terus ke Lundu.

“Lurung jalai tebing pantai ke Lundu enggau Jalai Besai Pan Borneo besambungka Kuching ke Telok Melano,” ku iya.

“Adenan rindu agi nengah jalai tebing pantai dibanding enggau jalai lama ke Lundu laban muntang agi kelimpah enda mayuh entukar baka beanti ngena feri,” ku iya.

Kenu ku iya mega, Adenan bisi dua kali berundauka perambu ngaga jematan nya agi nyadi Kepala Menteri awakka pekara nya dikemerat.

“Perambu deka ngaga jematan nya udah dikemendar enggau ungkus RM150 juta lalu patut iya dibuka tinda tengah pun taun 2018.

“Maya Barisan Nasional (BN) alah dalam PRU 14 tu tadi, pengawa ngaga Jematan Batang Rambungan entara projek ti dikinsil Perintah Besai dibaruh iring Pakatan Harapan (PH),” ku iya.

Taja pia, Adun Tanjung Datu, Datuk Amar Jamilah Anu ngaga pemutus minta projek nya dikemendar ari Kepala Menteri, Datuk Patinggi Abang Johari Tun Openg.

Kenu ku iya, seduai iya Jamilah ngenataika peminta nya ngagai Kepala Menteri lalu enggau nadai kakang peminta nya dikemendar kelimpah terus nangkup pengawa ngaga Jematan Batang Lupar, Batang Igan enggau Batang Lassa.

Sehari tu, Kepala Menteri bejadika pengawa nasih tanah ngaga Jematan Batang Rambungan, Lundu.