ENGKILILI: Pengerami Makai Lemai Raban Nembiak Skim Skrang 2019 mujur mandangka penyerakup raban nembiak Skim Skrang.

Pengerami tu diatur Raban Nembiak Skrang ba Balai Mensia Mayuh Johnichal Rayong Ngipa kena lemai kemari (Hari Enam).

Maya tu, Kaban Kunsil Nengeri (Adun) Engkilili Dr Rayong Ngipa nyadi temuai ke dipebasa alai tuju pengerami nya mega endang deka mai bala nembiak menua nya besemak agi begulai sereta sejalai penemu enggau iya.

Nambahka nya, pengerami tu bela ngembuan tuju nambahka turu Raban Nembiak Skim Skrang.

Chairman gerempung nya, Jimbun Rangkong ba jaku iya madahka sekeda ari batang kebuah pengerami diatur laban deka ngerami raban sida dalam gerempung ke ditumbuh ari taun 2016.

“Kitai mega beterima kasih ngagai Adun Engkilili Dr Rayong laban iya endang nyukung sereta ngembing kitai numbuhka Raban Nembiak Skim Skrang.

“Diatu mega kami bisi numbuhka siti raban ti deka ngemeranka main E-Lumba, sebedau tu udah mujur ngambi bagi ba main nya ke diatur di Kuching enggau Miri,” pia ku iya madah maya ngenataika jaku pengelalu ba pengerami nya.

Iya mega madah, gerempung sida andal amat digagaka siti bala mensia mayuh ti dikena raban nembiak betugung ngaduka program bekaul ungkup raban nembiak di Skim Skrang.

“Kami mega berasai temegah ati laban ari penumbuh gerempung tu kami besaup nyeliahka pengawa enda menuku ba raban nembiak.

“Taja pia, naka ke diatu kami bisi penanggul mimit ba belanja ti deka dikena ngatur program ungkup gerempung,” ku iya.

Nangkan iya, Penghulu Betok Tubi ti dipebasa bejaku maya nya minta semua sida ba menua nya anang enda nyukung Dr Rayong maya pengawa bepilih nengeri ti deka datai.

Kelimpah ari nya, iya mega madahka pengerami ke diatur sehari nya tau bendar ditandu dudi hari laban kelimpah dikena berami pengerami nya tau bendar ngempung nembiak dia sereta ngurangka pengawa enda manah.

Pengerami ti digulu Dr Rayong tu bela digulu bala tuai rumah ari Skim Skrang sereta bala kaunsilor kelimpah Pemesai Rela Lubok Antu Muhd Syazwan Al Amin sama datai ngerami program lemai nya.