“Perintah Sarawak deka terus nyukung ngerembaika penau bala nembiak ti landik ba bidang tu.”

KUCHING: Perintah Sarawak deka terus mantu sereta nyukung anak seni ba menua tu.

Menteri Dagang Temuai, Seni enggau Main Asal Datuk Abdul Karim Rahman Hamzah madahka Tenun Week 2019 siti pelasar ti manah dikena ngiga bala nembiak ti bisi penau dalam industri seni.

“Perintah Sarawak deka terus nyukung ngerembaika penau bala nembiak ti landik ba bidang tu.

“Taja pia, aku ngarapka Tenun ulih nyendiaka pengkalan data ngagai sida ti landik nya jemah,” ku iya.

Abdul Karim madah munyi nya lebuh Pengerami Nutup Tenun Week 2019 ba sebuah hotel ditu, kemari.

Nangkan nya ku iya, pelasar nya mega beguna dikena nerenak sida ke ba luar din ngambika ulih mandangka pengelandik sida.

“Nengah pengkalan data ti ngena, pelasar baka Tenun ulih ngemanah sereta nambahka agi guna sida ba maya ti deka datai.

“Tu nyadi titik keterubah ngagai pelasar nya ngerembai lalu netapka tuju ti betul,” ku iya.

Tenun Week ti keterubah iya dipejalaika nya berengkah diatur ari 19 ngagai 24 November.

Program ti diatur pengelama seminggu nya mandangka mayuh macham aktiviti ari artis landik sereta ngembuan penau lalu mandangka pengawa seni ngagai mensia mayuh.

Tuju Tenun iya nya ngaga lalu mantu mensia mayuh ngaga siti pekara ke baru.

Tenun Week mandangka enam bansa di Sarawak baka Iban, Melayu, Melanau, Bidayuh, Foochow, Orang Ulu enggau Bidayuh.

Mayuh macham aktiviti diatur nyerumba minggu nya baka kelas pengelandik, mandangka main asal, randau enggau reruai bedaja.

Lebuh pengerami nutup nya kemari, bela diatur mega iya nya pemenang ngagai Pekit Ngaga Tuak ke diempu Tuak by Simon ti mai pulai mata duit RM3,000 enggau piala.