“Ba Iban, leka marik ditela kitai enggau nama ‘Buah Pelaga’.

KUCHING: Akademi Serakup Dayak Iban Sarawak (Asadia) serak tu mai sida ke rindu ngaga ngepan lama Iban belajarka pengawa ngaga leka marik.

Pengawa nya diatur ba Kelas ‘seramik’ ti bekunsika penemu ngaga ‘seramik’ ngena tanah sebedau digagaka nyadi leka marik.

Kelas nya diatur Asadia begulai enggau Kaunsil Kraf Sarawak lalu betuaika pengajar Nabila Abdullah ari Kraf Jari Malaysia pampang Sarawak.

Nabila maya nerangka atur ajar ba kelas tu madah, ngaga leka marik siti ari pengawa asal ti dikemeran bansa Kelabit, Orang Ulu kelimpah bansa Iban.

NAMBAH PENEMU… Bala penyereta kelas ‘seramik’ begambar kenang. Bela ayan Ketuai Asadia Mabong Unggang (duduk, empat kanan).

“Ba Iban, leka marik ditela kitai enggau nama ‘Buah Pelaga’.

“Buah Pelaga tu diatu dikerinduka mensia mayuh lebih agi pengemeran kraf jari lalu ngepunka ngepan lama Iban baka tanggu majak laku,” pia ku iya madah.

Iya madah, pengawa ngaga leka marik ari tempa ‘seramik’ tau bendar nambahka penatai pemisi.

Ku iya, ‘seremik’ tu reti iya sebarang asil pengawa ngaga ari tanah nyengkaum leka marik.

“Tuju kitai begulai ngatur kelas tu dikena ngangkatka ngepan asal kitai bansa Iban ti begunaka leka marik baka tangu.

“Kelas tu mega dikena ngidupka pengelandik ngaga leka marik baka ti suah dipeda kitai ba ngepan lama,” ku iya nerang.

Ba pekara bekaul, Asadia nengah kerejasama Kaunsil Kraf Sarawak enggau Kraftangan Malaysia pampang Sarawak nangkan ke tu deka ngaga kelas ‘seramik’ dikena belajarka pengawa ngaga periuk tanah kelimpah kelas ngukir.

BEKUNSI PENEMU… Bala penyereta ti bisi ngambi bagi ba kelas nya.

 

MANAH…Asil kelas leka marik ba hari kedua

 

ARI TANAH LIAT…Tanah liat udah diproses digulung baka bush marik udah nya baru dichat sereta ditepu dalam perengka penunu.