LUNDU: Jalai menua tebing pantai deka nyadi jalai penyambung baru di Sarawak.

Menteri Muda Infrastruktur enggau Pemansang Penyangkai Kapal Datuk Julaihi Narawi madahka projek ngaga jalai menua tebing ai pemanjai 896 kilometer ari selatan ngagai utara Sarawak siti ari chara Perintah GPS Sarawak nambahka perengkaguna infrastruktur di menua pesisir nengah Program Penyambung Jalai Menua Tebing Ai.

“Projek tu nyerangkum pengawa ngaga jematan ke udah bisi ba pemanjai menua tebing ai dikena nganti semua servis feri ke bisi ba pemanjai jalai nya.

“Tiap bengkah jalai menua tebing ai ke udah bisi mega deka diseleti sereta dikemanahka ag,” ku iya.

Julaihi madah munyi nya lebuh bejaku ba Pengawa Nasih Tanah Jambatan Batang Rambungan ditu, kemari.

Nangkan nya ku iya, kelimpah ari projek jalai menua tebing ai, perintah mega udah ngemendarka Projek Jalai Besai Kedua (Second Trunk Road) ba entara jalai tebing ai enggau Jalai Besai Pan Borneo.

“Penembu dua projek jalai nya ila deka ngemuntangka pejalai ari Kuching ngagai Simanggang, Betong, Sarikei enggau Sibu.

“Menua baru mega deka dibuka kelebih agi ngagai pengawa betanam betupi dikena mantu rayat nyungkak tikas ekonomi pengudah dua projek nya tembu ila,” ku iya.

Udah nya ku Julaihi, projek ngaga jalai menua tebing ai diatu benung dipejalai lalu disadang tembu dalam timpuh lima ngagai enam taun.

“Pengudah tiga jalai (jalai menua tebing ai, Jalai Besai Kedua enggau Jalai Besai Pan Borneo) tu tembu, nya ulih ngemuntangka pengawa Perintah ngeamatka transformasyen pemansang ekonomi Sarawak enggau realistik.

“Kami andalka sereta pechaya nengah penyambung jalai ti manah di Sarawak ulih ngubah landskap ekonomi rama enggau terus, ukai semina ngagai rayat mengeri besai tang rayat ba menua pesisir baka di menua tebing ai enggau menua ulu Sarawak,” ku iya.