KUCHING: Pengelandik ngasilka produk rotan ari kampung Maister Lolee ari Long Leng siku peranak Penan mujur teulihka penatai pemisi enda kurang ari RM8,000 sebulan.

Apai ngagai enam iku anak tu madahka, enggau asil rotan iya nyengulaka semua anak iya taja nya ukai pekara ti muntang ngagai komuniti Penan.

“Kami bansa Penan endang beridup enggau rotan ngaga bemacham bansa pengelandik jari baka kantung, tikai, gelang jari enggau keresa bukai.

“Rotan ti bisi ditu digaga kami sebilik sereta dijual ba kampung enggau maya ngulu pengerami baka sehari tu,” ku iya.

Maister bejaku munyi nya lebuh ditanya Suara Sarawak lebuh nyereta Agrofest Sarawak di Stadium Nengeri Sarawak ditu, pagi tadi.

JAUH PENATAI…Maister Lolee ari Long Leng lebuh nyereta Agrofest Sarawak di Stadium Nengeri Sarawak ditu, pagi tadi.

Ku iya, Opis Betanam Betupi mayuh mantu iya ngerembaika dagang nyentukka iya bisi ngembuan sebuah kedai nyual rotan di Miri.

“Aku diberi latih enggau kus bedagang ari Opis Betanam Betupi.

“Ari nya aku belajar lalu nguji ngaul diri enggau dagang besai agi dataika aku bisi sebuah kedai di Miri,” ku iya.

Tandu iya, penanggul ti amat besai nuntung iya lebuh ngepunka dagang endang penanggul belanja.

“Aku ukai datai ari ruang bilik ti beduit, tambah mega nadai pemandai.

“Pekara belanja endang nyadi penanggul besai ngagai aku nyema deka mindah ngulu mayuh pengerami.

“Ngira ari ungkus pemakai, palan diau enggau ungkus perengka pengangkut kadang-kadang aku takut nangi belanja enda chukup,” ku iya.