Pendam dunya baru ungkup bala sebayan, endur numbakka bangkai orang ke udah sulai ari dunya tu sereta alai semengat orang ke udah midang diau. Nya alai nadai kebuah mensia ke agi idup ngachau ngeregau rumah orang ke udah mati baka nyengkubang pendam ketegal ti deka beambi ulih ngena chara muntang baka ngambi keresa tauka baya orang ke udah nadai.

Semua bansa bela ngembuan adat lalu adat bebaika baya lebuh orang udah nadai tu lebih agi ba kitai Iban mengkang dikemeran ari kelia nyentuk ke diatu. Tuju baya tu meseti dibekal nitihku tusui orang tuai ngambi nyadika bekal keresa orang ke udah mati lebuh sida nguan dunya baru ke dikumbai sebayan.

Genap sida ke dulu sulai sigi dibasa diri sebilik sereta kaban belayan nyengkaum diberi mandi enggau digari ngena pekayan ke pemadu manah. Baya ke dibekal ngagai sida nitihka pemisi ruang bilik sida empu. Semua pengawa tauka adat ngintu orang rabat tu endang bisi tusun kediri empu.

Taja pia, kemaya hari tu, datai sebengkah ‘penyakit’ ke suah amat kitai ninga dia pendam kitai bansa kena sengkubang raban orang ti enda mereti, mimit pan sida tu nadai ngira pengasai ati kaban belayan orang ti beempu sebayan.

Sebayan tu tau dikumbai dunya antu lalu sebut aja leka jaku antu tentu kitai ke agi idup berasai gelesi ngelawa palan ke baka nya. Tang lain sebengkah ba orang ti udu nyengkubang pendam tu sida langsung nadai berasai takut tauka nangi enggau utai nyelai ke enda sebulu enggau mensia ke agi idup.

Sida semina ngerunding asal utai ke dikeingin sida baka keresa barang berega nya ulih ambi. Udah chukup ngasuh ati sida puas. Bisi mega sekeda sida tu kena tangkap mensia mayuh lalu diukum pia bekuasa nitihka atur ke patut. Tang penyakit tu, mengkang bisi nyadi semina iya enda dikereja ba pendam ke sebaka.

Enda ngelala adat

Pengawa orang ke baka tu mega tau digelar enggau jaku kasar orang ke nadai nemu adat. Enti nitihka tusun Adat Iban 1993, dia pengawa orang ti ngachau perengka pendam tauka ngerusak perengka sebayan tau kena tunggu Munggu 150, genselan manuk siku enggau kering semengat.

Orang ti nyengkubang bangkai ari pendam mega tau kena tinggang adat kena ukum tiga pikul lalu ngisi tunggu Mungkul 250 ungkup genap iku bangkai. Mayar pelasi menua jani siku, kering semengat enggau kurung semengat. Sida mega patut mayar ungkus ngaduka baru kubur ke udah rusak.

Udah nya, ukum ngambi baya orang ari pendam sida tau kena ukum dua pikul lalu ngisi tunggu Mungkul 200, genselan jani siku, kering semengat enggau kurung semengat, lalu baya nya meseti dianjung pulai ngagai kubur nya baru tauka diganti enti udah rusak.

Ulah ti enda mereti baka tu dikereja laban deka ngulihka belanja enggau chara muntang. Ambika chunto sida kempang ngambi sebarang utai ke berega ba tubuh orang ke udah mati. Nyadi baya ke diambi sida nya tadi dijual dikena sida ngulihka duit.

Ambika chunto ba pun bulan Oktober tu tadi, dia kitai bela bisi meda berita ayan ba surat kabar dia tiga iku lelaki mujur ditan polis bekaul kes nyengkubang pendam ba kandang menua Miri.

Sida tu ditemu enchuri barang berega ke nyadi baya orang ke udah nadai. Enti diperati ari sukut umur sida tu ukai orang ke enda dapat gawa tang benung tegar mensia iya nya baru beumur 16 ngagai 27 taun.

Enti nitih umur maya nya, benung kering sereta regas gawa ba sebarang endur ke meruan sekalika sebelah kedai tauka kilang-kilang besai. Nyema bangat enggai gawa sebelah kedai tau mega dianjung gawa kunterik sama mega nya gawa kasar ari ti ngereja enda beradat ngerusak pendam orang.

Nitihka penerang ari surat kabar nya mega, penyampau rega emas ke ulih disengkubang sida tu tadi manggai RM5, 000 dijual ngagai sebuah kedai emas ke besemak.

Taja pia, tauke ti meli barang orang mati tu tadi udah ditangkap polis laban deka dipansik lalu asil rega barang mega dirampas ungkup pengawa pansik.

Ba pekara undang-undang sida ditangkap ketegal ngereja pengawa nyengkubang tu deka dipansik nitihka Seksyen 297 Kanun Keseksaan laban ngachau tanah pendam.

Berunding panjai

Bekau ari pemujur nangkap raban sida tu, kitai ngarapka pekara tu enda agi nyadi ba pendam bukai. Mayuh chara ulih dikena ngiga belanja taja kekadang gaji ke diberi nyangka enda terus besai baka asil bedagangka baya ari pendam.

Ambika banding pengawa orang ti meresi uras niting hari lebih badas sereta tinggi budi ari pengawa sida ti nyengkubang pendam. Amat kereja ngumpul uras ari rumah ke rumah endang betapi enggau pemar kediri empu tang pangka iya ngagai pemeresi kandang menua chukup besai reti.

Bekaul enggau penyakit nyengkubang pendam tu mega, kitai arapka Gerempung Ukai Dikuasa Perintah (NGO) enggau piak bekuasa ulih duduk betunga mua berundingka chara ti engkeman dikena nyeliah tauka nagang ulih ti enda menuku tu ari majak nyadi.

Inisiatif baka numbuhka komiti pendam tauka penyaga pendam nyangka sebagi ari buah runding ke tau diperati awakka kes tu nadai agi nyadi udah tu.

Bepelasarka penerang ari surat kabar, sekeda ari pendam kitai bansa ke kala kena sengkubang iya nya Pendam Katolik di Riam (Okt 2019 enggau Okt 2017), Pendam Roman Katolik di Jalai Tanjung Batu, Bintulu (Sept 2019), Pendam Batu Api di Betong (Feb 2018), Pendam Iban ba KM27 Jalai Sibu/Durin (Mei 2018), Pendam Ulu Nunuk Sungai Arip, Balingian (March 2017), Pendam SDNU Jalai Lasi, Meradong (Dis 2017), Pendam Kristian di Changkul, Engkilili (Mei 2018 enggau 2004), Pendam Anglikan Lambir (March 2017), Pendam Roman Katolik di Bukit Temudok (Nov 2014), Pendam Batu 10 Jalai Oya, Sibu (Okt 2014) enggau Pendam Maong Kerapa di Machan (Nov 2014). 

alvester bigol columnist