KUCHING: Palan Pemansang Sistem Pelajar Teknikal enggau Latih Vokasional (TVET) meseti nentuka silibus pelajar sereta latih semampai ditambah manah agi nitihka pemansang pelajar kemaya hari.

Kepala Menteri Datuk Patinggi Abang Johari Abang Openg madah, pekara tu beguna amat laban genap program TVET meseti ditambah enggau nangkup makit kereja ba menua tu.

Pia mega ku iya, bidang latih ti disediaka ngagai bala nembiak mega patut diperati baru enggau nitihka pemansang kemaya hari ngambi mengkang diterima lalu nangkup peminta industri.

“Graduet ari TVET deka nyadi pemungkal sistem tu ngambika menua kitai maju enggau bepenatai pemisi tinggi.

 “Chara belajar TVET belalauka latih ngajar nembiak bekenaka teknologi maya belatih deka nempa pengerai ti diguna nyadi pemun nyungkak ekonomi menua dudi hari,” ku Abang Johari.

Iya mansutka jaku nya rambau Konvokesyen Ke-22, Palan Pengelandik Kuching Sarawak (PPKS)/Kolej Entarabangsa Teknologi Lanjutan Sarawak (I-CATS) ba Palan Aum Borneo Kuching  (BCCK) ditu pagi tadi.

Sama datai Menteri Pelajar, Sains enggau Pansik Teknologi, Datuk Seri Micheal Manyin Jawong enggau Chairman PPKS ti mega Presiden Kolej i-CATS, Tan Sri Abdul Aziz Hussain.

Bisi 759 graduet ari Palan Pengelandik nya nerima degree, diploma enggau setipikit.

Ngelansa pekara nya, Abang Johari madahka chara perintah ngenegapka sistem TVET tu endang chara ke chukup manah seriris enggau agenda pemansang menua nengah mayuh bengkah sektor enggau nyikap diri napi Revolusyen Industri 4.0 (IR 4.0) sereta Ekonomi Digital.

“Sistem TVET tu ngasuh bala graduet laku dalam makit kereja kelimpah nyungkak ekonomi menua tu sereta nangkup peminta industri menua tu.

“Nya alai, kitai meseti nentuka silibus pelajar enggau latih diajar dalam semua program TVET nitihka pemansang kemaya hari enggau nangkup peminta dalam makit kereja,” terang iya.