KUCHING: Kaunsil Pemansang Ekonomi Sarawak (SEDC) diperansang nyerungkai bidang baru nitihka segang pemansang ekonomi dunya.

Kepala Menteri Datuk Patinggi Abang Johari Tun Openg madahka SEDC enda tau enda ngambi bagi ba pengawa mansutka produk methanol.

Ku iya, Sarawak ngembuan mayuh asil methanol ba kandang tebing tasik lalu produk tu nerima mayuh peminta ari menua luar kelimpah ulih mansutka penatai pemisi baru ngagai SEDC.

Pia mega ku iya, diatu Sarawak bisi taba loji Methanol nyengkaum pemeranak puku udah beranakka puku ba taba loji nya enggau tuju mansutka produk kimia ari methanol.

Abang Johari mega madah, kitai patut beratika empas ari ubah gaya hari ke diatu lalu ngerebut peluang ngemansangka ekonomi bepelasarka hidrogen.

“Hidrogen diasil ari ai lalu mayuh peminta. Nya alai kitai engka deka minta mayuh chukai jual ba pemansut hidrogen tu.

“Taja Sarawak baru ngaul dalam bidang hidrogen, bisi dua buah menua ke deka meli hidrogen diasilka ba menua kitai,” ku iya lebuh Pengerami Makai Taun ke-47 SEDC ditu, malam tadi.