BAU: Pengerami Tasik Biru 2019 disadang matak 40,000 temuai sepanjai tiga hari pengerami tu diatur berengkah Hari Lima ngagai Hari Minggu tu.

Pengerami Tasik Biru tu udah 60 taun mujur udah diatur lalu sekali tu deka ngatur mayuh rintai aktiviti ke bebida ari taun ke udah nengah program ke udah diperambu.

Entara aktiviti ke diatur tu nyengkaum Pekit Jong Regata enggau Jong Manah ke tebilang ngagai peranak ba menua tu.

Pemesai Pelilih Bau Anielia Sitam ti mega Chairperson Komiti Pengatur Pengerami Tasik Biru madah, pengerami tu deka richah diatur lebuh 40,000 pengusung disadang nedatka pengerami ke sekali tu kelimpah nyerumba kemisi sekula.

Nambahka nya, aktiviti bukai mega bisi diatur baka Panggau Rayat enggau mandangka main asal, Pekit Mr, Mrs Talent Bau Tasik Biru enggau Zumba, lumba rayat, gusti lengan, pekit e-sports, Kasus Saberkas Tasik Biru enggau Bau boat ride tour.

“Program dikena ngerichahka agi Pengerami Bau baka pengawa bejual asil betanam, kraf jari enggau pedagang, pemandang ari ejensi perintah lalu sebedau tu bisi diatur program beripai di Taba Pengerami Tasik Biru,” terang iya.

Iya madah, entara tuju Pengerami Tasik Biru 2019 dikena ngangkatka Tasik Biru nyadi palan penemuai sereta mantaika lumba ai ke chukup nyelai lalu nadai diatur ba endur bukai.

Kelimpah ari nya ku iya, pengerami tu dikearap ulih matak temuai ditu enggau menua luar ngelawa Pelilih Bau kelimpah nambahka penatai pemisi ekonomi komuniti ditu.

Berebak enggau nya, mensia mayuh dipinta sampal datai ngambi ngerindang ati enggau ngerichahka agi Pengerami Tasik Biru 2019 tu.

Pengawa bejadi Pengerami Tasik Biru enggau Pengawa Nasih Tanah Projek Jematan Tasik Biru deka dipenyadi Menteri Muda Infrastruktur enggau Pemansang Palan Penyangkai Kapal Sarawak Datuk Julaihi Narawi kena lemai pagila (Hari Lima).

Pengawa Ngelanchar One Stop Committee (OSC) dikena mutarka penanggul dadah renggat Pelilih Bau deka dipenyadi Adun Tasik Biru, Datuk Henry Harry Jinep kena Hari Enam tu seraya Pengawa Ngelanjar Pengerami Tasik Biru deka dipenyadi Menteri Dagang Temuai, Seni enggau Main Asal Sarawak ti mega Menteri Nembiak enggau Lumba Sarawak Datuk Abdul Karim Rahman Hamzah kena Hari Minggu tu.