BETONG: Dagang kain buriek bisi pengulih dikemansang nengah pelasar digital.

Ku pengajar kraf, Louis Kelaman, enti kitai berati, dunya diatu nyingkang ngagai dagang online nengah pelasar digital dikena nyerungkai makit besai agi sekalika ba menua tu empu enggau menua luar.

“Nya alai aku keran amat mai kitai kelebih agi raban indu ti bisi pengangkunka pengawa tu bela maju ba dagang pengelandik jari sereta bela ulih nangkup peminta makit diatu.

“Anang lembau ngerebut peluang ke bisi dikena ngerembaika pengulih kitai ba dagang tu laban kitai bansa dikelala ngembuan asil pengelandik jari ti nyelai sereta bisi kualiti,” ku Louis meransang.

Bengkel Kain Buriek ba Rumah Entrie Tabakang, Lempaong Anyut Paku, Spaoh ditu mujur matak 40 penyereta ti diatur Datin Amar Doreen Mayang lalu nerima sukung tegut ari bala pengemeran pengelandik jari bukai.

“Pengawa baka tu endang patut disukung laban ulih mantu peranak rumah panjai kelebih agi sida ke indu ngansah pengelandik diri begagaka ngepan baka kain buriek tu.

“Mayuh penguntung diulih ari bengkel nyengkaum ulih nambahka penemu enggau bakih, bekunsika buah runding kelebih agi pasal buah buriek ti deka ditusuk,” ku Louis lebuh dirandau Suara Sarawak.

Ungkup penerang, Bengkel Selampai Buriek enggau Kain Buriek deka diatur baru di Kuching kena 7 Disember tu. Sida ke bisi ati tau betanyaka penerang silik ngagai Rowena ba lumur 013-813 6440.

Bala penyereta semina mai tubuh diri aja laban semua kereban dikena ba bengkel nya endang udah disedia. Bengkel diperambu berengkah ari pukul 9 pagi nyentuk 2 lemai.