KUCHING: Peranak menua pesisir diansak ngerebut peluang beserimbai enggau program nyaga pengerai mata enggau servis selaput mata nadai bebayar ti disediaka Servis Oftalmologi enggau Optometri di baruh Opis Pengerai Malaysia (KKM).

Sapit Kepala Menteri Datuk Amar Douglas Uggah Emas madah, iya udah bekerejasama enggau Kelab Lions Kuching Metro (LCKM) sereta Klinik Katarak KKM (4K M) Sarawak kenyau ari taun 2013 nentuka peranak menua pesisir kelebih agi di Betong nerima pemaik ari servis nya.

“Meri terima kasih besai ngagai sida ti udah ngemujurka program tu. Naka diatu lebih 4000 pesakit selampur Sarawak ke alai 572 pesakit nya datai ari Betong.

“Sida ti napi penanggul selaput mata mega diperesa lalu beputung mata enggau nadai bebayar,” ku iya pengudah nerima penemuai meri basa ari LCKM ba opis iya di Wisma Bapa Malaysia ditu tadi.