DCF deka nirika Panggau Dayak ba Kuching

“Pengudah tembu, begunan nya deka digelar Panggau Dayak lalu deka alai mandangka ngepan tradisional Iban, Bidayuh enggau Orang Ulu.”

BETONG: Serakup Dayak Cultural Foundation (DCF) deka bisi begunan kediri di Mengeri Kuching, jemah.

Sapit Kepala Menteri Datuk Amar Douglas Uggah Embas madahka Perintah Sarawak udah meri siti tanah ba Jalai Ong Tiang Swee dikena nirika begunan nya.

Ku iya, nitihka penerang ari Chairman kaunsil DCF Tan Sri Leonard Linggi Jugah madahka begunan nya ila deka ngembuan semilan ringkat.

“Diatu benung ba renggat nyungkur taba projek nya,” ku iya.

“Pengudah tembu, begunan nya deka digelar Panggau Dayak lalu deka alai mandangka ngepan tradisional Iban, Bidayuh enggau Orang Ulu,” ku iya.

Uggah madah munyi nya lebuh bejaku ba Pengerami Makai Lemai berserimbai enggau pengawa nutup Simposiym Ngepan Iban (SNI) 2019 di Dewan Datuk Stephen Kalong Ningkan ditu, kemari.

Nangkan nya ku iya endur nya ulih nyadi alai bejalaika kus, seminar enggau pengawa matih.

“Tu nyadi siti pengawa ti mansang ngagai DCF ti deka ngemansang, ngetan sereta ngangkatka ngepan asal.

“Begunan nya deka nya siti ari pekara ti ngemegahka bansa Dayak pengudah tembu ila,”ku iya.

Berebak enggau nya, Uggah madahka komuniti dayak patut meda lalu chakah ngiga peluang dalam dagang kraf jari.

“Perintah Sarawak ditu benung beratika mayuh macham pekara ti ulih nambahka penatai pemisi ari menu pesisir.

“Nya alai, kraf jari siti ari pengawa ti bisi penau ba pekara nya,” ku iya.

Ku Uggah, siti ari chunto iya nya nengah industri kraf jari, Sarawak ngerikodka asil penyampau RM30.5 juta ba taun ke udah.

“Ari Januari ngagai Mei taun tu, penyampau RM13.6 juta asil udah dirikod.

“Tu nunjukka industri nya ngembuan penau ti chukup besai dalam nambahka penatai pemisi komuniti,” ku iya.

Uggah mega ngarapka ba simposium ti deka datai, piak pengatur pengawa ulih ngemasukka siti slot pasal industri nya.

“Kitai patut ngiga strategi dikena ngenegapka pemansang sereta kaul enggau pemeranak puku.

“Kitai patut berati ngagai teknologi baru dikena mansutka ukai semina kuantiti tang mega kualiti.

Entara kraf jari ke pemadu laku iya nya Pua Kumbu sereta manik, ku iya nambah.

Ba lansa ke sama, Uggah meri geran RM50,000 dikena bejalaika simposium taun baru.

Sapit Menteri Kaunsil Kandang Menua enggau Pengawa Berumah Datuk Dr Penguang Manggil besetuju deka nyadi chairman pengatur simposium taun baru nya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak