KUCHING: Sapit Kepala Menteri Sarawak Datuk Amar Douglas Uggah Embas menang kes saman defamasyen enggau petenah ngagai Ketuai Pemadah Parti Keadilan Rakyat (PKR) Vernon Aji Kedit pasal penerang sengaja ngemaruhka Uggah senentang Tanah Adat Bansa Asal (NCR) ba Kort Tinggi, ditu tadi.

Akim Kort Tinggi Ravinthran N Paramaguru merintahka Vernon mayar ganti rugi RM200,000 ngagai Uggah kelimpah mayar bayar luyar penyampau RM40,000.

Ravinthran nyemetak madah dalam saman malu nerangka Vernon Aji Kedit dalam Whatsapp mantaika jaku petenah ti ulih ngelabuhka pejalai politik Uggah ti nyadi Ketuai Dayak ke chukup dipebasa.

Dulu ari nya, Uggah kala minta Vernon matak pulai jaku iya dalam Whatsapp Group Chat sereta minta ampun ba mua mayuh nengah semua surat kabar pasal penerang jaku petenah nya.

Taja pia, Vernon nulak peminta Uggah laban keran madahka jaku iya patut ditemu semua raban bansa ke bisi tanah Adat Bansa Asal (NCR) kelebih agi pasal hak sida.

Uggah mega kala meri timpuh ngagai Vernon, pukul 5 lemai kena 1 Ogos 2019 matak jaku enggau minta ampun lalu enti Vernon majak kering penemu, iya deka disaman RM1 juta nyengkaum belanja bukai.

Taja pia, Vernon madahka semua jaku iya dalam Whatsapp nya ngarika komuniti asal ti ngempu tanah NCR di Sarawak.