KUCHING: Aplikasyen ‘Google Live Transcribe’ ngemuntangka pengawa bala pemberita ngerikod terus jaku orang ke dirikod.

Pemberita New Strait Times, Trinna Leong bekunsika penerang madahka aplikasyen nya endang ngemuntangka pengawa bala pemberita laban ulih mansutka jaku nyadi leka ke udah ditulis.

“Aplikasyen tu endang beguna ngagai bala pemberita laban mayuh entara kita bisi penanggul mansutka pekara ke udah dipadah lalu nulis nyadi leka jaku.

“Bisi sekeda bala pemesai bejaku lebih ari sejam lalu nya ngasuh kitai lembau deka mendingka baru rikod nya tadi,” ku iya madah seraya ketawa.

Trinna madah munyi lebuh lebuh bengkel Google News Initiative iCube Innovation ditu, pagi tadi.

Kelimpah ari nya, iya madahka pekara nya semina ulih ngalihka siti jaku aja ngagai jaku bukai.

“Jaku ke udah disalin nya ulih disimpan pengelama tiga hari.

“Kelimpah ari nya jaku nya mega ulih diadu (edit) baru nitihka pekara ke udah dirikod,” ku iya seraya ngelalau pemberita ngambika ngerikod ba telefon kedua.

Kebuah pia laban aplikasyen nya enda ulih nyimpan jaku ke udah dirikod, semina pekara ke udah disalin betulis.

Rambau bengkel nya, urung 30 raban media ari mayuh bengkah ejensi ngulu GNI.