DULU ari tu, kitai udah kala ngelansa pasal pesaka berega ba mata kitai bansa Dayak Iban.

Munyi ku disebut siku Blogger, Nicholas J. Ugik sebedau tu, kitai enggai nyadi bejaku lebih ba bansa bukai laban chura pendiau enggau jalai pengidup kitai ti nentuka nama bagi pesaka berega ba genap raban bansa.

Nyadi tikas randau kitai tu nguji berati ari sukut tinjau penemu bansa kitai Iban sentang pesaka ti pemadu berega ba bansa kitai kelimpah ari tanah iya nya pemandai sekula.

Kena ngepunka batang jurai serak tu, dulu mai kitai ngelansa silik pasal siti agi pesaka bansa ti nyungkak pengidup kitai iya nya pelajar sekula.

Pemandai sekula disemaka kitai enda dipeda asil ba pun pengawa tang mansutka asil chukup galak ba ujung lalu tau nyadika kunchi ba pengidup kitai siku-siku, ku iya.

KUNCHI PENGIDUP MENYANA… Pemandai ba sekula meseti dikena ngemansangka diri empu, diri sebilik, komuniti enggau menua.

Iya mega disempama pesaka lalai ti semina ditemu orang ti amat-amat ngembuan pengeran ati dalam pelajar sekula. Munyika udah dikenang, pelajar sekula tu baka ke beranakka puku dalam saham.

Nuan amat merinsa maya ke nyengula ke bala anak kelebih agi ba duit ringgit tang enti pelajar sida tu mujur, tu tau mai ubah pendiau kitai ngagai tikas ke meruan agi.

LANSA PENGIDUP

Bepelasarka kenang jerita tuai, kitai Iban tu nadai nemu urup tulis. Nya alai kelia semua penemu ba leka main Iban, adat enggau jerita semua ditusui ari siti serak ngagai siti serak ti baru. Semua nya dikingat lalu ditampung ngambi ke bisi nyadi penyanding rebak dudi.

Ari batang pengidup, kitai bansa Iban munyi ke udah dikenang aku sebedau tu endang beridup ba tanah ari ke betanam betupi, nubai mansai sereta ngasu beburu.

NEMPA PEMUJUR… Sekeda ari graduet UiTM berasai gaga pengudah mujur nembuka pelajar sida.

Dulu menya kitai ngemeran ke pengawa bumai betaun. Nya alai aki ini kitai kelia seruran mindah alai ngentap ke diri ketegal ngiga tanah ti manah endur bumai enggau babas ti bisi diuan jelu siga.

Bebida enggau dunya kitai diatu, pelajar sekula ulih disempama baka kereban dikena bumai betaun lalu pemandai nya asil ari padi ditanam kitai.

BERUBAH SINGKANG

Endang gaya kitai nitihka putar dunya ti majak mansang, kitai mansang ke mua mesti bisi ngembuan penemu baka bansa ti udah dulu mansang kelebih agi ba industri enggau teknologi.

Ba menua Europe empu kelia dalam taun 1600, sida tu asal iya endang ari pengawa bekebun enggau betupi.

Ari pemandai runding dalam guna teknologi, sida iya berubah ngagai kebun bedandang besai sereta asil ti belimpah agi ari ke udah ti digela orang Revolusi Betanam Betupi.

DIKEANDAL MERI PENYENANG… Nadai lebih ari pemujur ba pelajar ngasuh ati apai indai kitai lantang.

Pengudah sida tu nyulut dalam pengawa bekebun bedandang besai, orang Europe lalu ngalih ngagai pengawa industri.

Pia mega ba pengawa industri, pansik, injin stim enggau teknologi dikena ba kilang ngeluarka barang ti diguna mensia mayuh majak mayuh semayuh ditumbuh dikena meransang ekonomi menua sida.

Asil ari utai tu tadi mai menua Europe dulu nyingkang ke mua ari menua bukai dalam dunya tu jeman taun 1600 kelia lalu pemujur sida diteladan menua maju bukai nyentuk sehari tu.

Nya alai mayuh anak kitai, anak Iban patut ngembuan penemu ti bakanya ngambika sida nadai kakang ati nerima ubah enggau segang pemansang sereta liat ati napi pemar dunya kemaya hari.

MERETIKA TANGGUNGPENGAWA

Chara iya nadai jalai muntang enti ukai ari pelajar sekula. Pia mega pelajar sekula ti siti ari chara kitai deka mai ubah ba tikas pengidup kitai sebilik.

Pengawa bersekula tu tau dilebaska kitai ngagai dua bagi; tanggung pengawa apai indai enggau tanggungpengawa nembiak sekula.

Apai indai enggau nembiak sama besemekih enggau pengajar ngemansangka pengawa sekula.

Keterubah aku deka nyara penemu ba tanggungpengawa apai indai meri pelajar menyana ngagai bala anak sida.

Aku pechaya apai indai nganjung anak bersekula ketegal ka ngasuh pengidup bala anak sida meruan dudi hari kelimpah deka ngubah tikas pemanah pengidup ngambika nyamai agi.

Nya alai apai indai dilalau ngambi ke anang bechiping ati dalam pengawa nyengulaka anak lalu anak ti besekula tu sempama nuan nerenak puku dalam saham.

Asil anak saham tu mih dikena nuan dudi hari, nyadika penabat pengidup kita sebilik laban kitai enda ulih nela tauka naga pekara ti deka nyadi. Ukai reti kitai ngajih rangkang ngachuk mata, tang manah agi ngadang dulu.

Tambah pia, pengawa bersekula tu selalu dipeda kitai dilempai ba tanggungpengawa bala pengajar aja. Tu penemu enda entu engkeman dikemeran kitai.

Ya, endang amat nya tanggungpengawa pengajar ti ngajar nembiak tang kira ke manah agi enti bisi saup ari apai indai ti sama-sama ngelalau nembiak kelebih ari lebuh anak sida tu di rumah.

TANAM JULUK ATI

Kelimpah ari nya, anak ke besekula meseti bisi juluk ati diri empu ti ka mujur dalam pengawa bersekula sereta nyapai utai dikingin nyengkaum nyulut ba pengawa dikereja sida.

Tu dikumbai orang ‘internal motivation’ tauka peransang ari dalam ati diri ti tau ngasuh ati kitai puh ngiri penemu, liat napi penguji enggau pintar ngerebut peluang ngena penau enggau pengelandik.

Nadai orang ulih nulung kitai enti ukai ari pemendar ari kitai empu. Patut anak sekula nemu reti tuju pelajar sekula tu munyika udah dikenang kitai dulu tadi.

Penyampau bansa kitai Iban ti udah bisi ngembuan pelajar tikas degree engka agi tinggal ari bansa bukai tang tu ukai reti kitai deka terus tinggal.

Pekara tu meseti bisi dalam runding ngambi ke bebendar agi kitai ngemaju kediri ba pengawa besekula ngulihka pemandai ngambi ulih ngemansangka bansa enggau menua.

SIMPUL KENANG

Kena nambah ke tanggung pengawa apai indai enggau nembiak dalam pemujur pengawa besekula, aku meda kitai Iban mayuh ke udah mujur dalam pengawa begaji besai sereta bisi ngembuan kompeni dagang kediri empu.

Anggap mih tu tanggungpengawa ngagai bansa kitai empu enti meri munggang ringgit dikena ngatur program mantu nembiak Iban dalam pengawa besekula.

Tu mih maya pemadu manah kitai ngempung pangan diri enti sema ba pekara bukai kitai Iban enda ulih sama runding enggau sama jaku, ba pemansang pelajar kitai tau seati, tau selubang penemu ngemansangka bansa diri.

Pengabis jaku aku, sama meda orang meda diri, minta ampun enti kair jari tu enda engkeman ba ati kitai siku-siku.