“Diatu aku agi dalam proses deka ngeluarka produk pemajik gamal, ‘bridal’ enggau ‘Spa’ ngena chap nama aku empu.”

Kelimpah chakah ba pengawa pemerindang siku penanyi ti kala tebilang enggau lagu ‘Asai Ati Enggai Beserara’ Linda Simai diatu udah nyingkang ngagai dunya dagang iya nya ngeluarka produk pemajik gamal ti ngena chap iya empu.

Iya ti mega benung dalam proses deka ngeluarka album baru enda lama agi ngaku diri amat kiruh sereta enda ngetu diambi belagu ba mayuh pengerami.

“Diatu aku agi dalam proses deka ngeluarka produk pemajik gamal, ‘bridal’ enggau ‘Spa’ ngena chap nama aku empu.

“Kelimpah nya, diatu aku mega benung kiruh nyikap album baru ti deka dikeluarka enda lama agi ungkup bala peminat,” ku iya lebuh dirandau Suara Sarawak, kemari.

BEDAGANG PRODUK…Kelimpah belagu Linda mega chakah ba pengawa dagang iya nya ngeluarka produk pemajik gamal ngena nama diri empu.

Ku iya, pejalai dagang enggau pengawa nyadi penanyi iya bejalai serentak lalu deka beroperasyen ngagai mensia mayuh taun baru tu ila.

“Hari Krismas tu aku nadai ngintu di menua laban bisi merindang mensia mayuh di Sibu enggau di Lundu.

“Kena malam 24 enggau 26 Dis tu tadi, aku bisi merindang peminat ba Sibu lalu 28 Dis (kemari) merindang ba Lundu,” ku iya nerang silik.

Nangkan nya, iya mega arapka diri ulih meri fokus ngagai dagang sereta andalka album baru deka diterima bala peminat baka album ti udah keluar sebedau tu.

“Aku bedau ulih madah nama album baru tu awakka bala peminat gidan nganti.

“Enggau awak tu aku besampi ngambika kitai semua sama bulih berekat sereta gerai belama,” ku iya.

Linda kala ngeluarka lagu-lagu tebilang baka Melan-Melan, Tusah Nyadi Menantu, Pugai Belalai, Anang Salah Guna Kuasa enggau Japai Udai Jamah Udah.

Bepun masuk dalam dunya pemerindang enggau LUH Sibu diatu nama Linda agi mengkang disebut lebuh maya bisi pengerami laban lagu iya bisi bemacham rentak ti manah dikena bala mensia karoke.

Lagu ti pemadu baru dikeluarka iya nya Dirantai Pengerindu ba taun 2017 ti mujur bulih 1.5 juta orang ti meda ba ‘youtuba’.

Lagu Dirantai Pengerindu tu mega kala nyadi finalis Anugerah Charta Sapa Juara (ACSJ) Musin ke-5 ba taun 2018.

BEDAGANG PRODUK…Kelimpah belagu Linda mega chakah ba pengawa dagang iya nya ngeluarka produk pemajik gamal ngena nama diri empu.