Alon Lupeng tebilang enggau lagu ranchak

KUCHING: Taja ukai peranak Iban, tang pengerindu belagu dalam lagu Iban meransang Alon Lupeng mansang dalam industri muzik Iban menua tu.

Alon, siku peranak ari Kampung Mantung Birawan di Serian, madahka diri naka diatu iya udah bisi enam buah album sepanjai ngaul diri dalam industri tu.

“Kenyau ari terubah aku berengkah dikelala dalam industri muzik tu, aku udah bisi enam buah album. Semua pait manis dalam indsutri tu mega udah diasai magang.

“Album pemadu laku naka diatu iya nya Album Pinang Belah Tiga dikeluar ba taun 2010 lalu nengah album enggau lagu tu mega ngangkatka nama aku dalam industri tu,” terang iya enggau tuchum manis.

Lebuh dirandau pemberita Suara Sarawak, Alon madahka Album Pinang Belah Tiga nya nerima mayuh timbal chukup manah ari bala peminat lalu tu meri peransang ngagai iya.

KELAI LAGU DITERIMA PEMINAT… Entara VCD lagu Alon Lupeng ke udah dikeluar.

Ku iya, ukai pengawa ti muntang enti disebutka pekara ngambi ati peminat ke datai ari pupu bansa kelebih agi bansa Iban empu.

“Engka udah rejeki aku ba industri tu lalu orang ti rinduka lagu-lagu Iban ukai semina bansa Iban aja.

“Kira ke bonus ngagai kami ke nyadi penanyi nyadaka lagu Iban mega tu pelaba aku,” ku iya.

Ngenang sentang Youtube Channel ku Alon, lagu Pinang Belah Tiga lebih ari 500,000 iku orang udah meda lalu bisi 1,000 lebih udah meri ‘like’ lagu nya.

Nguji nyadaka lagu berentak ranchak, Alon naka ulih ngerintaika leka lagu ti mai reti seriris enggau utai ke nyadi ba pengidup kitai besehari sehari ngambi bisi ke lalau enggau teladan.

ENDA LEMBAU MERINDANG… Alon merindang bala peminat di Pesta Lada Julau ba taun 2014.

“Leka lagu ti mangka pengidup kitai siku-siku jampat agi diterima peminat laban sida mega ulih ngasaika reti lagu nya kelimpah ulih ngasuh ati rindang, ati lantang,” ku iya nampung.

Ngembuan sada nyawa ti manah sereta nyelai ari bala penanyi bukai, lagu Alon berentak ranchak suah ditebah lebuh bisi pengerami baka melah pinang, gawai sereta pengerami besai ke bukai.

Nangkan nya, Alon madahka diri taun tu bisi mansutka siti single ke baru iya nya Gilek Gilek Kepala.

“Tu single pemadu baru ari aku ba taun tu lalu udah bisi dijual sebelah kedai bejual CD enggau VCD ba selampur Sarawak.

“Aku bisi amat pengandal lagu dalam single tu mega deka diterima sereta dikerindu bala peminat baka lagu ke udah-udah,” ku iya andal.

Kelimpah ari lagu Iban, Alon mega bisi ngaga single dalam Jaku Bidayuh lalu mengkang ngemeranka rentak lagu ti ranchak baka lagu Iban iya ke bukai.

Tu mandangka pengelandik iya ba pengawa belagu seraya ngetanka penulin jaku bansa iya empu taja dikelala enggau tampak nama lebuh nyadaka lagu bansa Iban.

Kelimpah ari belagu merindang peninga, Alon mega madahka diri bisi bejalaika dagang kediri empu dikena iya ngisi maya lepa kelebih agi lebuh nadai program belagu ba menua bukai.

“Aku bisi numbuhka dagang VCD lagu diri empu berindik ari pengangkun enggau pengeransing aku deka maju industri tu.

“VCD tu dijual aku ba studio ditumbuh aku empu diberi nama Lupeng Studio Production,” terang iya silik.

Nya alai, Alon ngelalau mensia mayuh kelimpah ari bala peminat iya ngambika meli VCD tulin lalu anang sesekali meli ke chelak tiru.

Kebuah pia ku iya, enti sema sida meli barang chelak tiru, reti iya sida sengaja munuh industri muzik Iban sereta mechahka periuk asi bala penyanyi.

Entara lagu Iban disadaka Alon Lupeng ti chukup tebilang sereta suah ditebah sebelah radion kelimpah ari Pinang Belah Tiga iya nya Pala Sebinggau, Tabin Seminggu, Pemanis Gula, Putus Tali Benang, Berangat Asai Cabi, Sulu Kepit Pintu, Diau Sebulan, Nganti Nuan Janda enggau mayuh agi ke bukai.

Enda tinggal mega lagu Bidayuh diberi nama Joget Asih Boh Genan, Kumang Aseng, Dayung Bidayuh, Joget Cap Piranuk, Ngampan Janda enggau Joget Dayung Lawa sereta ke bukai.

Lagu mai ati rindang diumba tiun ranchak ngasuh kaki kekebak nitihka tiun ti seruran kitai deka betanda kelimpah nama lagu ti nyelai, nama Alon Lupeng dikelala ari pengelebih iya tu.

Lagu Pemadu Manah ba Anugerah Juara Rentak Ruai (AJARR) 2011, Alon enggau penengkebang lagu Jackson Dana bisi nerima Anugerah Khas kelai ngenang jasa enggau sukung seduai ngagai industri Muzik Dayak.

Ba lansa sama, lebuh dirandau bekaul enggau pemansang iya dalam industri nya ba taun baru, Alon semina madahka iya bisi perambu baru ba pengawa iya ti belagu.

“Aku endang bisi runding deka ngaga siti album tauka single ke baru taun baru taja apin bisi langkar ke nyengala naka diatu.

“Nya endang juluk ati tang aku deka beratika baru baka ni gaya tanggungpengawa aku kelimpah meda gaya timbal ari bala peminat ti rinduka lagu aku,” ku iya madah nyemetak.

Ba sukung enggau pengawa ngemansangka industri muzik Dayak, baka bala penanyi bukai, Alon mega nadai kala lembau merindang bala peminat iya ba pengerami ria (FunFair) enti sema bisi peminta enggau nerima kangau ari bala pengatur.

Nya siti ari chara dikena iya meri sukung sereta ngetanka pejalai muzik Dayak ngambika ulih mansang baka industri muzik bansa bukai menua tu.

Besai pengandal ati Alon deka meda industri muzik kitai ditu ngerembai sereta dikelala ba renggat entarabansa lalu nengah channel Youtube entara pelasar pemadu manah ungkup tuju nya.

“Pupu bansa ari serap dunya ulih ngiga (search) lagu kitai nengah channel nya lalu sida ulih meri timbal ke pemaik muzik menua tu ari pemayuh meda (view) enggau rindu (like).

“Nengah channel baka tu mega kitai deka nemu timbal bala peminat kelebih agi sida ke bekereja jauh di menua orang baka di Semenanjung, gaya peminta enggau bansa rentak lagu dikerindu sida ngambika nyamai endur kitai berunding lebuh nengkebang tiun enggau leka lagu,” ku Alon nyimpul randau.

Suara Sarawak