Autisme Run 2020 diatur 22 March

KUCHING: Gerempung Autism Kuching (KAA) deka ngatur Autisme Run 2020 kena 22 March taun baru.

Presiden KAA Datuk Dr Yao Sik Chi madahka pengawa nya dikena sida ngumpul belanja mantu nembiak autism ba KAA.

“Naka tu gerempung bisi 121 iku nembiak autism ti dipinta bayar (yuran) siku nembiak urung RM200 ngagai RM400, tang kebendar iya siku nembiak begunaka RM850 belanja.

“Nya alai, ba taun tu kami ngangarka belanja ngeluie RM600,000,” ku iya.

Sik Chi bejaku munyi nya lebuh ditanya pemberita ba Program nyuaka ‘Love-In-A-Box’ ngagai nembiak autism KAA ba Jalai Desa Wira ditu, kemari.

Tambah iya, belanja sida tu besai laban tiap iku nembiak meseti dijaga siku pengajar.

“Tiap iku nembiak deka diajar nengah pematih ‘Applied Behavior Analysis’ (ABA) ti begunaka siku nembiak siku pengajar.

“Pematih tu mega beguna dikena nambahka penau komunikasyen, penau rama, penau meri fokus sereta ngambika sida tan duduk lama,” ku iya.
Pom nyereta Autisme Run 2020 tau digiga ba website tauka datai terus nuju opis KAA di Jalai Desa Wira ditu.

Tandu iya, sida mega begunaka belanja dikena ngaga sebuah agi begunan baru ngimbai begunan lama gerempung.

“Palan tu (KAA ba Jalai Desa Wira) kebendar palan meri pematih ngagai nembiak autism udah enda chukup napi pemayuh sida.

“Nyadi kami merambu deka ngaga sebuah agi begunana baru ti beungkus urung RM3.5 juta.

“Aku arapka mayuh komuniti ba luar datai mantu sereta nyaup kami ngulihka belanja,” ku iya.

Nangkan nya, iya mega madahka diatu geleri asil pengelandik jari nembiak autism bisi dibuka ngagai mensia mayuh.

“Sida bisi diajar ngaga biskut, nero, nusuk marik, nusuk gelang jari enggau ke bukai.

“Ngagai sida ba luar ti deka meda tauka meli asil pengelandik jari sida datai aja kitu (KAA ba Jalai Desa Wira).

“30 peratus ari barang ti dijual deka diberi ngagai nembiak nya empu lalu 70 peratus diempu gerempung dikena ngumpul belanja,” ku iya.

KAA diatu ngembuan 27 iku pengajar ti ngajar nembiak autisme beumur tiga ngagai 37 taun.

Ba taun 2018, ungkus operasyen KAA dalam mantu nembiak autisme manggai RM932,000.

Suara Sarawak