Balai Ringin terus dikemansang

BALAI RINGIN: Peranak ba sitak Balai Ringin deka terus ngasaika pengelantang ari pemansang projek Jalai Kampung Senawa ke Sitak Ubah ditu.

Menteri Muda Nembiak enggau Lumba, Datuk Snowdan Lawan madah, projek nya udah dikemendarka perintah nengeri lalu deka dipejalaika dalam lima renggat.

Ku iya, pengawa ngaga jalai raya nya mandangka perintah nengeri seruran mendingka peneka enggau guna rayat ba renggat baruh.

“Enti udah tembu jemah, iya deka meri pengelantang tauka pangka positif ari sukut sosio enggau ekonomi rayat besemak,” ku iya.

Iya madah munyi nya rambau Bejadika Pengerami Pantu 2019 ba Dewan Sri Pantu, Pasar Pantu, ensana.

Bela datai Residen Sri Aman, Indit Bangai enggau Pemesai Pelilih Sri Aman, Mohamad Ashree Wee.

Berebak enggau nya, iya ke mega Adun Balai Ringin madah, projek bukai ke dikemendar perintah nengeri iya nya Kompleks Mini Stadium Balai Ringin.

Ku iya, projek mini stadium tu diperambu deka digaga ba Pasar Balai Ringin nengah ungkus dianggarka RM10 juta.

“Kepala Menteri mega udah ngemendarka peminta kitai numbuhka palan pengereja pengawa ke baru ba sitak Balai Ringin dibaruh pegai Sri Aman.

“Tu sebengkah ari inisiatif awakka sebagi ari genturung pendiau ba baruh pegai Serian, Simunjan enggau Samarahan diiring nengah siti palan pengereja pengawa iya nya Pelilih Sri Aman,” ku iya.

Suara Sarawak