Bonsai nyiur mayuh peminta

MUKAH: Rindu meda penyelai gaya sebansa kayu dikumbai bonsai, Nahar Abu Samah, 54, diatu ngemeranka pengawa nanam kayu bonsai nyiur ti mujur di bagi menua tu.

Naka diatu, Nahar ti mega gawa berikan landik ngelagu lebih 100 kayu bonsai nyiur, ukai semina manah nyadika ayam mata tang mega nyelai dipeda.

Ku Nahar, iya berengkah nanam bonsai ari lepa pengawa kelimpah rindu meda penyelai utai tumbuh nya ti bisi dibantai orang sebelah media rama.

“Terubah nguji suba, aku nanam lima paung nyiur tang semina tiga aja ke nyadi. Aku majakka pengawa nya enggau nguji chara nanam ke bukai dataika mujur,” ku iya lebuh dirandau Suara Sarawak.

Tiap pagi Nahar deka ngelimpangka awak iya abis nadai dua jam beratika kayu bonsai ti ditanam besemak rumah di Kampung Kuala Matu Hulu ditu.

Iya madah, taja pengawa dipeda rumpas tang kereja ngelagu bonsai begunaka pengepuh laban kayu tu enda tau enda seruran dijaga ninting hari dataika iya nyadi.

Pia mega ku iya, ngaga struktur bonsai ti manah dipeda, gaya tangkai daun puda patut dilangkar dulu dataika iya ngerembai kelimpah nempa akar ti tegap.

“Kitai mega enda tau enda nentuka iya tumbuh besai enggau nadai utai ngachau baka indu utai tauka indu sampuk ti tau munuh kayu tu.

“Baka kayu bonsai ke bukai, pun nyiur tu mega meseti dijaga enggau diintu meruan. Taja pia, ngaga iya nyadi bonsai, kitai patut milih buah nyiur ti engkeman.

Ba aku empu, tentu deka milih nyiur mawar,” terang iya. Ku Nahar, pengawa nanam kayu tu digaga enggau cheremat enggau bejimat nentuka iya ulih tumbuh galak sereta meruan.

“Selaput nyiur tu mega enda tau enda dituris tang enda bangat suah, belebuh nitihka pematut.

“Maya kitai nuris selaput iya, anangka tekenaka sumbuk ti baru pansut laban tau ngasuh kayu mati.

“Dikena nambahka ‘seri’ bonsai nyiur tu, bisi sekeda iya dichuk ngena sekeda chura nitih kedeka ati,” ku iya.

Rega bonsai nyiur ditanam iya tau manggai RM120 sepasu nitihka pemanah langkar enggau penyelai penumbuh dan, pating enggau daun bonsai nya.

Kelimpah ari dikena ngelagu rumah ku Nahar, bonsai mega nerima peminta ari mensia mayuh nyadika derian enti bisi pengerami melah pinang.

“Sebedau tu, aku semina ngemeranka pengawa tu kena ngisi awak lepa tang majak meri awak lebih agi pengudah nerima peminta lebuh nyereta pengawa bejual di Matu apin lama ke udah.

“Naka diatu, sebagi ari orang ke meli bonsai nyiur datai ari Matu enggau Mukah, tebal agi bala bakih enggau orang ke kala meda pemanah asil keranjai jari aku.

“Pia mega ari pengawa ngelaku produk tu sebelah media rama dikena matak mayuh agi orang rinduka utai tanam nyelai baka tu.

“Nya alai aku ngarapka diri ulih nyerungkai makit besai agi udah tu ari peransang sida ke udah meli enggau sukung ari semua.

“Kebuah pia laban aku nemu utai tanam baka tu bisi pengulih besai makit enda dikemansang ngena chara ti betul, ” ku iya nyimpul randau.

Suara Sarawak