DLP dipejalai nitihka kurikulum KPM

KUCHING: Program Dua Jaku (DLP) ungkup pengawa ngajar subjek Sains enggau Matematik dalam Jaku English taun baru dipenyadika kemari ba sebuah hotel tebilang ditu.

Ketuai Direktor Opis Pelajar Malaysia Datuk Dr Amin Senin begulai enggau Direktor Opis Pelajar Sarawak (JPNS) Dr Azhar Ahmad bejadika program nya kemari.

Ku Dr Amin, berengkah ari taun 2020, DLP deka dipejalai ngagai raban nembiak Primari Satu ba 1,048 bengkah sekula primari.

“Pejalai program nya berindik ari Pemansang Pelajar Malaysia (PPPM), 2013-2025 Anjakan 2 : Ngambika semua nembiak landik dalam Jaku Melayu enggau English.

“Tu siti ari pengawa Perintah Sarawak nyungkak ekonomi nyadi nengeri ngembuan penatai pemisi tinggu ba taun 2030,” ku iya.

Nangkan nya, iya madahka pejalai DLP nya nitihka kurikulum ti udah ditetapka opis menteri.

“Nya alai, nadai bida entara subjek Sains enggau Matematik di Sarawak enggau nengeri bukai, semina jaku nya aja ke enda sama.

“Pejalai DLP di Sarawak enda melakangka Jaku Melayu ti nyadi jaku nasional menua tu,” ku iya.

Kelimpah ari nya, Dr Amin madahka semua pengajar patut nyadi agen pemadu beguna dalam pejalai DLP Sarawak.

“Nya kebuah perintah udah merambu mayuh macham program enggau aktiviti ngambika pengajar Sains enggau Matematik ulih bejalaika pengawa ngajar sereta belajar ba dua bengkah subjek nya ngena Jaku English,” ku iya nerang.

Ba lansa ke sama, Dr Azhar madahka pengajar ti ngajar dalam dua subjek nya ngena Jaku English udah dipatih ngena chara ti sigi diatur ngagai sida.

“Tu endang diberi fokus ngagai pengajar ti ngajar nembiak Primari Satu taun 2020, lalu tiap modul pematih disediaka Institusyen Pelajar Pengajar Malaysia (IPGM) enggau Palan Pematih Jaku English (ELTC).

“Pengawa mayih pengajar tu mega udah diatur berengkah bulan September ngagai Oktober tu tadi ke alai 2,434 iku pengajar enggau fasilitator ari 184 iku pengelicha ari Instistusyen Pelajar Pengajar Kampus selampur Malaysia, tiga staf ELTC enggau 128 School Improvement Specialist Coaches (SISC+),” ku iya nambah.

Udah nya, Azhar nampung madah pengajar mega diberi latih tambah ngena Jaku English chara online lalu 40 jam dikemataka piak ELTC.

“Perengka pelajar baka Dokumen Standard Kurikulum enggau Pentaksiran (DSKP) ti dikemansangka Bagi Pemansang Kurikulum nyadi dokumen ti beguna dikena bala pengajar.

“Bup teks enggau bup latih nembiak KPM mega dikena nyadi perengka ke diguna dalam bilik belajar,” ku iya.

JPNS bebendar nyendiaka perengka sukung baka video PdP Sains enggau Matematik nengah bantu ari Sektor Pengeraja Teknologi Pelajar, JPNS ngena chara betemu ari oengajar ngagai pengajar dikena mansangka pemujur pejalai DLP di Sarawak, ku iya nerang silik.

Rambau program nya, urung 500 pengajar, pemesai enggau pengereja pengawa perintah datai ba program nya pagi kemari.

Suara Sarawak