Gempuru Krismas Sarawak diatur pagila

KUCHING: Raban Kristian ke diau ba pelilih mengeri tu bela ditesau ngulu pengerami Gempuru Krismas Sarawak (Sarawak Joint Christmas Service) 2019 kena pagila (19 Dis).

Program enggau rambai jaku ‘Christ:The Birth, The Light, The Reason’ nya deka diatur di Christian Ecumenical Worship Centre ACS berengkah ari pukul 7.30 lemai.

Sekretari Besai Gerempung Gerija-Gerija Sarawak (ACS) Elder Ambrose Linang madahka program ti diatur ninting taun tu siti ari chara ACS ngenegapka semengat begulai, penyerakup enggau pengelantang entara rayat Sarawak.

“Kelimpah ari program tu, mayuh bengkah program baka bejalai bebala mayuh Krismas, Gempuru Besai enggau ke bukai udah dipejalai ACS ba selampur bagi menua tu dikena nyerakup rayat.

“ACS seruran neruska pengawa ngelakuka penyerakup enggau pengelantang rayat menua tu laban penyerakup mega siti tungkat ngagai pemansang ekonomi rama,” ku iya madah munyi nya rambau aum pemberita di ACS ditu, kemari.

Kelimpah ari raban Kristian, sida ke megai pengarap bukai baka Buddha, Hindu, Bahai sereta Sikh ti kala nyereta program diatur ACS bela dikangau nyereta program nya.

Ku Elder Ambrose, pengawa besembiang nya deka mungkur sampi ngagai pengelantang dunya, penyerakup menua sereta rayat enda ngira pupu bansa tauka penatai.

Gerija Seventh Day Adventist nyadi tuai pengatur program nya ti diketuaika Pastor Terry Valten Simon.

Jaku sembiang deka diberi dalam tujuh bengkah jaku iya nya Jaku Melayu, Jaku English, Jaku Iban, Jaku China, Biatah, Bukar enggau Lun Bawang.

Ba lansa ke sama, Elder Ambrose mega madah rambau program ke sama diatur ba taun 2018, urung 3,000 iku raban Kristian sereta pengarap bukai datai ngagai program nya.

Nya alai, iya ngarapka mayuh agi raban Kristian ngulu program ti deka diatur hari empat tu.

Berebak enggau nya, Pastor Gerija Baptist ti ngarika Gerija Baptist Sarawak sereta siku ari komiti pengatur program tu, Pastor James Ganie madahka sida benung beratika program tu ulih diatur ba palan ke lebih besai agi ngambika mayuh agi raban Kristian datai ngulu program tu.

“Ba mengeri tu aja bisi lebih 10,000 iku raban Kristian ari mayuh bengkah gerija.

“Program besembiang begempuru baka tu patut digaga ba endur ti besai agi ngambika ukai semina Kristian di Kuching aja ulih datai tang mega raban Kristian ari bagi menua bukai di Sarawak,” ku iya.

Suara Sarawak