Makai mulung lebih kenyang

KUCHING: Mulung ulih nyadi pemakai ti sebaka enggau asi kelimpah ngasuh kitai berasai lebih lama kenyang.

Matilda Pieng, siku peranak Melanau madah mulung nyadi pemakai dikena nganti asi ba bansa sida.

“Mulung tu sama aja enggau asi, ulih diempa enggau bemacham lauk bukai.

“Ambika chunto mulung ulih diempa enggau ikan goreng, pusu kena makai pagi tauka diulam,” ku iya.

Lebuh dirandau Suara Sarawak, Matilda madahka mulung lebih ngenyangka perut enti dibandingka enggau asi.

MERI SUKUNG… Matilda (kanan) begulai enggau anak sereta uchu ba Wisma Melanau apin lama.

“Enti indai aku suba sigi suah ninga iya madah nadai kenyang makai asi.

“Tiap kali makai endang bisi aja mulung kena nganti asi,” ku iya nusi peneleba diri.

Nangkan nya ku iya, chara mulung digaga iya nya ngena tepung mulung lalu dichampur enggau seku padi.

“Seku padi ke dipilih meseti seku ke manah sereta alus, ukai seku kena orang suah meri jani makai nya,” ku iya seraya ketawa.

Tu ngasuh mulung ke digaga nya mansutka bau rengut sereta nyamai diempa.

Seku ke dichampur enggau tepung sagu nya tadi meseti diinjin alus ngena mesin seku empu.

“Enti suba, laban ke nadai mesin seku, orang endang belandik agi nutuk seku nya.

“Tang diatu, nadai agi orang ke rajin ngaga pengawa kiruh bakanya,” ku iya.

Kelimpah ari nya ku iya, enti nadai seku dichampur begulai enggau sagu, sagu enda ulih digaga segala baka ke suah dipeda kitai nya.

Matilda mega madah mulung mega ulih dichampur dalam kari manuk.

“Benung kari nya engkurak, tabakka mulung atas kuah kari nya, nya ke dikumbai kami telisih,” ku iya nerang pemakai ke ulih dichampur enggau mulung.

Ku iya, sagu bisi mayuh macham bansa baka mulung Mukah, mulung Dalat, mulung Tian sereta ngembuan pemesai ti bebida.

“Enti mulung Mukah, pemesai iya besai lalu mulung Dalat pemesai iya mit aja,” ku iya.

Iya madahka diri rindu agi makai sagu Mukah laban asai iya mega bisi bida enggau mulung ke bukai.

Suara Sarawak