Pipuih pemakai asal ti jarang dipeda

KUCHING: Pipuih tauka isi ikan dalam bungkus daun nyadi pemakai indu bepenti enggau anak mit ba komuniti Melanau.

Siku orang ke bedaja di Program Hari Ruang Bilik diatur Gerempung Melanau Kuching (PMK) Matilda Pieng madahka pipuih makin jarang dipeda laban nadai agi orang ke landik ngaga pipuih.

“Enti kelia, pipuih tu diempa enggau bubur kelebih agi indu ke baru udah beranak tauka bepenti enggau anak mit.

“Tu berindik orang tuai kelia ti sigi nyaga raban indai ke bepenti ngambika sida enda ngambi pemakai ti bau tauka beguring,” ku iya.

Lebuh dirandau Suara Sarawak, Matilda madahka proses ngaga pipuih begunaka proses ti mayuh sereta pedis, nya alai mayuh nembiak rebak baru kurang rindu ngaga pemakai nya.

NYAMAI DIEMPA… Isi ikan bebulan pengudah nyadi pipuih.

“Ikan ke dikena ngaga pipuih tu ikan parang tauka digelar kami ikan bebulan.

“Lebuh ngaga pipuih, makin mayuh tulang ikan nya, makin nyamai asai pemakai ke digaga,” ku iya nerang.

Matilda madahka sebedau nyadi pipuih, ikan nya tadi deka disalai atas para, dichampur enggau garam mimit lalu dilakka enda ditetak. Taja pia, ikan ke disalai enda tau kelalu rangkai tauka kelalu mansau.

“Pengudah disalai, ikan nya diengkah ba jagan lalu isi ikan dialuska dikena muai tulang ikan nya tadi,” ku iya madah ngagai Suara Sarawak.

Udah nya, isi ikan nya deka dipadatka atas siti bansa daun lalu ditanchang ngena tiga tali ba pun, ujung enggau tengah bungkus sebedau iya dipanggang atas api ke enda nemu padam.

NYUAL PEMAKAI ASAL…Matilda (kanan) begulai enggau anak sereta uchu iya lebuh Program Hari Ruang Bilik PMK di Wisma Melanau ensana.

Kelimpah ari nya, Matilda madahka makin lama bungkus isi ikan nya dipanggang,makin manah agi laban enti isi ikan basah, nya tau ngasuh iya bekulat.

“Agi bisi orang bejual ke pipuih tu di Mukah, tang pedis deka ngulihka pipuih laban nembiak diatu enggai ngaga pipuih,” ku iya seraya madah iya empu pan enda nemu ngaga pipuih, semina meda orang tuai ngaga pipuih nya.

Rega sebuku pipuih di Mukah semina RM10, tang iya nyual nya enggau rega RM15 ba program nya laban pemakai nya pedis ka digiga di Kuching.

Penyelai pipuih, iya ukai semina ulih dikelauk tang mega digaga nyadi pemakai kena ngirup lemai lalu diempa enggau sago.

“Bisi mega bansa bukai ke meli pipuih ru laban sida enda kala meda enggau ngasaika pemakai nya laban tu endang pemakai asal Melanau,” ku iya nambah.

Suara Sarawak