PSB deka mejah pekara ti enda betul

“Kelimpah ari nya, PSB mega deka nyadi parti ti mejah pekara tu enda betul nyema bisi pekara salah dikereja parti ke merintah.”

ENGKILILI: Parti Sarawak Bersatu (PSB) deka nyadi parti ti berani mejah pekara tu enda betul nyema bisi pekara salah dikereja parti ke merintah, ku Ketuai Nembiak iya Dr.Johnical Rayong Ngipa.

Ku iya, PSB enda diterima dalam Gempung Parti Sarawak (GPS) ti ngujungka PSB ngaga pemutus berani iya nya nyadi parti ngati kediri lalu terus bejalaika pengawa negika hak rayat nengeri tu.

Dr Rayong ke mega Adun Engkilili madah projek Bekal Ai Beresi enggau Kuasa Karan ungkup sitak Kunsil Nengeri (Dun) Engkilili deka dipejalaika penuh berengkah taun baru.

Nyadi dua bengkah pemansang nya udah dalam perambu lalu deka belabuh digaga ba taun 2020.

Dr. Rayong madah munyi nya rambau Pengerami Mangkung Tiang enggau Numbuhka JKKK Rumah Rawing Jilin, Bukit Kundong, Tebarong Skrang, apin lama ke udah.

Berebak enggau nya, sama bisi bejaku Tr.Rawing madahka sida serumah chukup betuah laban ngembuan siku pengari rayat ti chukup siru sereta penyinu ngagai rayat dipegai iya.

“Ketegal ari pemanah iya (Dr.Johnical Rayong) mega ngujungka mensia mayuh nadai belampung ati sereta seruran nyukung iya nyadi pengari ba sitak Engkilili,”ku iya.

Nambah nya ku iya, pemujur nirika rumah enggau JKKK Rh.Rawing kelai sukung nadai bebagi sida serumah ungkup pengari sitak nya kelimpah sama ngemeranka pemansang menua pesisir.

Berebak enggau nya, Chairman PKKM Pampang Engkilili, Tr Johnson Damu madahka pengaga ati diri meda kerejasama sereta sambut enggau timbal ti chukup manah ari mensia mayuh dalam ngemujurka program nya.

“Chukup gaga ati meda pemanah kaul peranak ditu lalu besai pengarap aku kaul baka tu semampai dipejalaika jemah ila,”ku iya.

Pengerami tu digulu urung 200 iku rayat ke besemak lalu Dr Johnical Rayong Ngipa bisi ngungkupka agih belanja RM7,000 ungkup JKKK Rumah Rawing Jilin ngatur program ke pemaik mensia mayuh.

Suara Sarawak