Rambai jaku ‘Enda Nguji Enda Nemu’ nyadi peransang Seman

Serak tu kitai bekelala enggau siku agi pedagang ari Saratok ti ngembuan mayuh macham pengelandik, penau sereta majak dikelala mensia mayuh.

Bepanggai sereta pechayaka rambai jaku ‘Enda Nguji Enda Nemu’ ke lalu diambi iya nyadika kunchi pemerani sereta pengeran ati nujah dunya dagang iya.

Seman Endoi 31, asal ari Rumah Amis, Lubok Kerupok, Kabo Awik berengkah ngaul diri enggau dagang Fesyen Enggau Penganta kenyau ari taun 2013.

Berengkah ari nya, iya enda malik ke belakang agi sereta suah mega enggau ngeruh ai ngambi bagi nganjung penyereta ba mayuh bengkah Pekit Kumang Gawai selampur Sarawak lalu iya ke pemadu baru tu tadi bisi ngambi bagi ba Pekit Kumang Raban Ngepan Iban Tikas Nengeri Sarawak (2019) ke alai Tim iya mujur bulih Champion ba pekit nya.

Kelimpah ari nya, Seman mega suah lalu mayuh udah nganjung penyereta enggau masuk pekit ke bukai baka Pekit Kumang Gawai Bagi Saratok,Roban enggau Betong sereta semua pekit disereta iya mujur teulihka Champion enggau lumur dua.

Taja bisi pengawa tetap gawa perintah ba sebuah sekula di Saratok, tang nya enda nanggul Seman bejalaika pengawa dagang tu laban iya ukai mina ngembuan penau senentang Penganta enggau Fesyen tang chukup bepenau senentang bidang penganta enggau nengkebang keresa ngepan Iban.

NYADI AKIM…Seman (duduk kiba) maya dikangau nyadi Ketuai Akim Pekit Ratu Pengerami Saratok 2019, apin lama ke udah.

Laban endang sigi ngembuan penau enggau pengelandik ngantaka orang, nya alai iya suah dikanggau ejensi-ejensi perintah enggau siku-siku orang ti bisi ngatur pengerami tauka program.

Berindik ari pemerani sereta pengelandik bejaku betungga enggau mensia mayuh ngujungka iya suah mega di asuh nyadi bulu balang pengerami (Emcee) kelebih agi pengerami bekaul enggau penatai tauka bala menteri.

Pemadu baru, Seman bisi dikanggau nyadi Ketuai Akim ba sebengkah pekit beserimbai enggau Pengerami Saratok 2019 ti baru abis tengan bulan tu tadi (15 Dis) ke alai ba pekit nya Adlinea Alexander peranak ari Rh.Gayan,Dassey Krian mujur menggi gelar Ratu Pengerami Saratok lalu mai pulai perais RM1000.

“Dalam pengelama enam taun kenyau ari taun 2013, mayuh pemedis, pemerinsa, pemar enggau penguji datai udah diasai.”

“Tang laban sigi ngembuan pengeliat ati lalu enggai alah laban penguji.”

“Pia mega endang juluk ati aku ari suba iya nya deka meda pekayan ngepan kitai Dayak lebih agi bansa Iban dikelala ba selampur dunya.”

“Puji Tuhan diatu aku mujur numbuhka Manzz Mimozz Touch And Art,”ku iya lebuh dirandau pemberita, apin lama ke udah.

Nangkan nya ku iya, Manzz Mimozz Touch And Art tu nyadika terabai iya dalam semua aktiviti dagang iya pengudah tu ila.

“Kelimpah nya mega aku bisi nyendiaka bagi dagang ke bukai baka servis Ngubah/Ngias Pelamin, Ngias Pengantin sereta mega bisi ngaga perengka ngepan Iban.”

“Nya alai nuju mensia mayuh lebih agi ba pelilih Saratok ti begunaka penerang silik senentang dagang lalu deka nguji asil keranjai jari aku tau betanya nengah lumur 013-5642202 (Seman Endoi) sereta tau mega ngelawa Facebook aku benama Manzz Mimozz.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak