Seleti jampat Jalai Sibu-Selangau

SELANGAU: Mensia mayuh betengahka Jalai Sibu – Selangau nyima laban penanggul jalai rusak dia lalu enda dikeibuh piak menggi tanggungpengawa.

Ku Exco Nembiak Parti Rakyat Sarawak (PRS) Kaunsilor Henry Kanyan Vincent Rawing, gaya jalai belubang enggau ngandang ai, mayuh enda sebela sereta belakin abis tebabak tau endar ngeruga pengelikun sida ti betengahka jalai nya.

“Jalai balat rusak ukai semina ngasuh tayar pesuk enggau pechah aja tang mega tau ngasuh penusah bebadi nyadi lalu nabanka nyawa.

“Mayuh amai sebana ari mensia mayuh senentang jalai tu, nyauka ninting hari dibantai ba media rama, nyadi batang kenang sebelah Facebook.

“Bisi sekeda entukar pesuk tayar, pechah, entukar rusak nyengkaum penusah bebadi,” ku iya lebuh bejalai ngabas gaya rentayan Jalai Besai Pan Borneo ba Sibu – Selangau ditu, tadi.

Nya alai iya minta Opis Kereja Raya (JKR) enggau piak Lebuhraya Borneo Utara (LBU) mendingka sebana mensia mayuh lalu ngiga chara pemadu manah mutarka penanggul tu.

Suara Sarawak