Serba Dinamik mutar penanggul ditapi nembiak Politeknik Kuching

KUCHING : Politeknik Kuching Sarawak (PKS) udah nerima pemeri sebuah bas ke ulih muat 44 iku penumpang ari Serikat Serba Dinamik Holding Berhad, ditu pagi ensana.

Direktor Gerup enggau Ketuai Pemesai Eksekutif Serba Dinamik Holding Berhad ti mega Penyanding Penemu Industri PKS Datuk Dr. Ir. Mohd Adbdul Karim madahka pemeri nya kelai pemanah serikat nya seruran ngintu pengelantang nembiak ba PKS.

“Bas tu deka ngemuntang pejalai nembiak ke diau ba luar kampus berundang sepenyauh 22 kilometer ari mengeri Kuching.

“Inisiatif tu mega dikena mutarka penanggul nembiak ke napi penanggul nadai perengka pengangkut mensia mayuh lebuh ngagai kampus kelebih agi nembiak ba luar kampus,” terang Abdul Karim.

Iya mansutka jaku nya ba aum pemberita pengudah bejadi Pengawa Nutup Minggu Bekelala Enggau Nembiak Baru PKS sereta Pengawa Nyuaka Bas ari piak Industri di Dewan Jubli Perak PKS, ditu kemari.

Suara Sarawak