Tanah ke pun pengidup

BATANG pekara ti deka dibai pengarang sara kitai ba karang serak tu iya nya berandauka pesaka berega ba mata kitai bansa Dayak Iban di menua tu.

Ba bansa bukai kitai enggai nyadi bejaku lebih laban chura pendiau enggau jalai pengidup kitai ti nentuka nama bagi pesaka berega ba genap raban bansa.

Nyadi tikas randau kitai tu nguji meda ba bansa kitai Iban ke alai bejurai ke dua iti pesaka ti pemadu berega ba bansa kitai iya nya tanah enggau pemandai sekula.

Tang dikena ngepunka batang jurai serak tu, dulu mai kitai ngelansa silik pasal tanah ti nyadika pun pengidup bansa kitai kenyau ari menya.

Mindah Ngiga Pengidup

BEMAIN DI AI… Kitai bansa Iban endang bagas begigaka lauk kena beridup.

Endang udah ari jeman aki ini kitai kelia, bansa Iban sigi beridup ba tanah lalu nadai lebih ari tanah endur ngulihka pengidup, ke pengeraja.

Baikka pengawa bumai betaun tauka ngasu beburu, kitai bansa Iban sigi semampai mindah ari siti endur nuju siti endur ti baru enti nyema tanah ba endur ke lama nyau kusi ti ngujungka asil bumai betaun nadai mayuh.

Pia mega enti jelu babas tauka paku tubu ba endur ke lama nyau pungkang udah tentu kitai mindah nuju endur ti baru. Aki ini kitai neranting tulang berimba ke ke kampung puang alai sida beridup; bumai betaun enggau ngentak ke rumah panjai.

Nya alai pendiau kitai bansa Iban tu ngerekai ba segenap endur ba Pulau Borneo tu laban aki ini kitai kering ati merimba menua alai beridup.

Tanah Mandangka Pemagas

REGAS… Aki ini menya semampai mindah nuju menua siti-siti ngiga pengidup ti entap agi.

Pengudah kitai dipegai Rajah Brooke, polisi iya nyukung pengawa kitai Iban berimba ke alai beridup baru. Ari nanga ai nyentukka entigis ai abis menua udah dipungkal kitai Iban.

Ba jalai pengidup kitai Iban, pengerajin tu pekara ti patut bisi ba tiap iku bansa Iban baik indu lelaki tauka tuai biak. Chukup malu enti orang nya enda nurun ke tanah lebuh ari ke manah tauka maya ngereja umai.

Chukup malu enti nadai nemu ngereja pengawa tauka mantap ke duku. Siti ari pendiau kitai bansa iya nya malu ka minta enggau malu ka nyanda.

Ari nya tadi kitai nguji bumai enggau naka penegar tulang diri laban takutka padi enda chukup empa ngantika datai ba maya ngetau taun baru.

Senutuk enggau polisi perintah Brooke nyukung pengawa kitai Iban berimba, nya alai perintah pan bisi ngaga siti adat tanah ti dikumbai Tanah Adat Bansa Asal (NCR).

Reti iya, enti kitai berimbaka tanah nya, kitai mih bempu iya. Besai agi perimba kitai, besai agi ga ungkup kitai.

Pengudah NCR tu dipujurka perintah Brooke, kitai bansa Iban siti ari bansa ba menua Sarawak ngembuan tanah adat ti chukup mayuh.

Pemakai Menua, Pulau Galau

KERING…Pungka lelaki nadai lembau betebangka kayu digagaka ramu kena ngentak rumah panjai baru.

Ari tu tadi, bisi leka jaku Pemakai Menua enggau Pulau Galau (PMPG) nandaka tanah ti udah diperimba siti-siti rumah panjai sereta adan entara enggau menua rumah panjai bukai.

Semua utai tu tadi ari pengering ati, pengeregas, pemagas enggau pengepuh aki ini kitai kelia berimbaka kampung puang, tanah baru alai ngepunka pengidup ti menyana agi.

Pengudah taun 1945 maya perintah Rajah Brooke (Rajah kepenudi iya nya Charles Vyner Brooke) diganti perintah British, kitai Iban kelebih agi ari pelilih bagi Betong diasuh perintah merimba menua baru.

Sida tu iya nya Iban ari batang Layar, Awik, Krian, Spak enggau Skrang bisi angkat pindah ke Tubau, Jelalong, Suai, Sibuti enggau Limbang.

Perintah lalu meri guna kuasa ngagai Penghulu Ulin iya nya siku tuai bansa Iban asal penatai ari Spak mai bala Iban pindah ngagai endur ke udah disebut aku nya tadi.

Nya alai kitai bisi meda peturun Iban ari pelilih Krian, Awik, Spak, Skrang enggau Layar bisi ba sebelah menua Jelalong tauka Sibuti laban aki ini sida ti udah pindah kelia.

Pia mega, tanah perimba kitai bansa ba endur nya pan bisi lalu nyadi pesaka ngagai peturun sida ke baruh hari tu.

Kenang Rama Tanah

NGIGA TEMUDA… Entara kayu ti besai-besai suah ditebang ba tanah baru diperimba.

Pekara tu patut ngasuh kitai betanya ngagai diri sama diri. Nama kebuah enggai enda bansa Iban diasuh perintah Rajah Brooke enggau British merimba menua enggau mungkal endur baru? Saut iya bisi ba tiap iku kitai ke macha karang tu.

Aku empu bisi saut aku empu. Mulai ke kenang kitai ngagai pesaka ti berega iya nya tanah tu, kenyau ari taun 1970-an kelia kitai Iban tau dikumbai nyadi juluk ati ba bala orang ti balat ingin ke tanah kitai bansa.

Kenyau ari taun 1990-an kitai mega meda mayuh kitai Iban nurun niki kort laban becharaka tanah ti besangkut paut enggau kompeni batang, kompeni kebun sawit bedandang besai enggau ulah siku dua orang politik taja ukai semua.

Mayuh udah penyarut dipeda kitai beduduk ari tanah NCR tu. Aku empu enggai nyadi bejurai ke penanggul lebih dalam agi enggaika dipeda orang ari sukut pikir politik ti ngujungka orang salah anggap. Bala mayuh lebih nemu jerita ti bendar.

Apin lama ke udah dalam taun 2018 tu tadi, kitai bisi ninga perintah Nengeri Sarawak udah bisi udah ngubah (amendment) undang-undang tanah NCR tu.

Sebubu jaku kenang bala mensia bekaul enggau pekara tu. Sekali agi aku nanya bala mayuh senentang undang-undang baru tu, untung tauka rugi kitai Iban?

Saut nya bisi ba kita laban kitai Iban endang udah jeman iya beridup ba tanah, aram mih kitai ngenan ke pesaka kitai tu.

Sekali nuan berunding ka nyual iya, tak nyentukka peturun ichit nuan pan bedau temu ulih nebus tanah ti dijual tadi. Sekali kitai enda ibuh ke penanggul undang-undang tanah, seumur idup kitai nesal nadai badu laban lenyau reta pesaka.

Simpul Randau

Kira simpul ngena jaku pandak, pesaka kitai Iban ti chukup berega iya nya tanah.

Kebuah pia laban pengidup kitai Iban endang begunaka tanah dikena bumai betaun, betanamka engkayu sepun dua, endur ngasu beburu, maku nubu enggau mansai nubai enti ba endur nya bisi ai sungai.

Aki ini kitai kelia jeman ti udah rimpi babun patah, udah lesi nangga hari udah parai nangga lemai dikelala ari pengawa sida ti kering berimbaka kampung puang dikena ngepunka pengidup.

Aki ini kitai enggau naka pengeliat ati neresa endur baru ngambika peturun sida enda suntuk temuda perimba dikena beridup.

Pekara tu mih patut ditemu kitai bansa Iban ngambikq buah tanah enggau temuda perimba kitai enda lenyau ngagai jari orang bukai.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak