SARATOK: Pengawa ngerejister diri nyadi kaban ‘Volunteer Smartphone Patrol (VSP) beguna amat dikena mensia mayuh meri penerang ngagai piak polis nengah chara nganjung penerang ngena telefon pintar.

Ketuai Opis Polis Pelilih Saratok, DSP Mordani Tanin madah chara ngerejister nyadi kaban VSP ulih digaga nengah online.

Mensia mayuh tau nganjung sesebengkah penerang enggau tau enda ibuh ngelawa opis polis,”ku Mordani.
Iya madah munyi nya rambau Program Polis Begulai Enggau Mensia Mayuh ba Dewan Panggau Besai Sri Kalaka ditu pagi tadi.

Nangkan nya, ku iya siti agi program deka dipejalaika iya nya Amanita, program ngenyemak diri enggau raban indu (bini orang) ba genap rumah panjai enggau Kampung pelilih Saratok, Roban enggau Kabong.

“Bala pemesai polis indu ti udah dipadu deka suah agi ngelawa tauka betemu enggau bala indu ba rumah panjai enggau genturung pendiau di pelilih menua tu.”

“Tu mega deka nyadi siti platform ungkup orang indu bekerejasama,nyaup sereta mantu PDRM ngemunaska pengawa jai sereta ngelanggar undang-undang.”ku iya.