KUCHING: Gerempung Bansa Dayak Bidayuh Nasional (DBNA) mantaika enam pelin strategik ti ngandalka Perintah Sarawak ulih bejalaika nya ungkup komuniti Bidayuh nyapai ekonomi bepenatai pemisi tinggi datai ba taun 2030.

Ketuai Penyanding Penemu DBNA, Datuk Seri Michael Manyin Jawong madah, tu nyadi dokumen ti ngundan perambu ungkup program enggau projek pemansang.

“Pelin strategik tu deka mantu komuniti Bidayuh nyikap diri sereta ngambi bagi ba Juluk Pengelantang Begulai 2030.

“Juluk besai kitai deka nyediaka langkar kereja pemansang komuniti Bidayuh ngambika nadai sapa tinggal,” ku iya.

Manyin mansutka jaku nya ba jaku pengelalu beserimbai enggau Gempuru Taun Baru DBNA ditu, malam tadi ti digulu 1,000 iku kaban ari 21 Pampang DBNA nyengkaum ari Lembah Klang.

Enam pelin strategik 2020-2030 ungkup komuniti Bidayuh iya nya gerempung ti meruan, pelajar enggau pengelandik, pemansang, main asal, jaku enggau pesaka asal, dokumentasyen tanah NCR enggau pemansang tanah NCR, program pemansang orang dagang sereta pemansang komuniti enggau servis ngintu pengelantang rama.