KUCHING: Kepala Menteri Datuk Patinggo Abang Johari Tun Openg nerima manah perambu nirika Rumah Temuai ti diperambu Gerempung Bansa Dayak Bidayuh (DBNA).

Abang Johari madahka Perintah Sarawak deka berundingka peminta belanja RM16 juta ti dipinta DBNA ungkup tuju nya.

“Taja pia, pekara tu deka diperunding pengudah diserenih Unit Perambu Nengeri (SPA),” ku iya lebuh Penferami Gempuru Makai Taun Baru 2020 enggau Genap Taun Ke-65 DBNA ba Dewan Serbaguna DBNA ditu, malam tadi.

Ba lansa bukai lebuh dirandau pemberita pengudah pengerami nya, Menteri Pelajar, Sains enggau Pansik Teknologi, Datuk Seri Michael Manyin Jawong madahka sida udah nganjung perambu gaya langkar ngagai SPA.

“Tuju iya deka minta pemendar nyungkur taba enggau ngererak begunan lama ba endur nya.

“Kami merambu ngaga lapan ringkat Rumah Temuai lalu enti dikemendar, timpuh ngaga projek dipelaba pengelama 18 bulan,” terang iya ti mega Ketuai Penyanding Penemu DBNA.

Manyin mega madahka Rumah Temuai nya deka digaga ba laman Indu Opis DBNA ditu.

“Tu ungkup guna semua komuniti lalu ukai ungkup raban bansa Bidayuh aja,” ku terang iya.