KOTA SAMARAHAN: Bisi 3,000 igi buah rian diagihka pechuma ngagai mensia mayuh ke ngulu program Sarawakku Sayang ditu, pagi kemari.

Pemesai Opis Betanam Betupi Ahmad Arisa Kachon madahka siti ari tuju pogram makai buah rian tu iya nya dikena nerenak ulah mensia mayuh makai asil buah ditanam menua tu.

“Dalam program Lan Kito Makan Durian Lok tu, buah rian tu ukai semina buah rian ari pelilih Samarahan aja tang mega buah rian ari Simunjan enggau Serian.

“Nya kebuah kitai nyampur semua buah ke dikemisi kitai sehari tu ngambika ulih diasaika komuniti ke bisi datai ba pengerami tu,” ku iya.

Ahmad Arisa madah munyi nya lebuh dirandau pemberita sebedau ngagihka 3,000 igi rian ngagai komuniti ba program nya ditu, kemari.

Nangkan nya ku iya, Opis Betanam Betupi mega mai bansa rian pemadu manah iya nya Musang King rambau program nya.

“Ukai nya aja, kami mega mai bansa buah bukai ke ngembuan kualiti ke pemadu manah.

“Nya alai, aku ti mega nyadi pengatur program tu meransang mensia mayuh ngambika sama bela ngasaika asil tanam sida ke ngereja pengawa betanam betupi tu,”ku iya.