Genturung pendiau baruh patut bejejaga

SIMANGGANG: Sekeda genturung pendiau iya nya Kampung Gua Dunggat, Jalai Isu/Gayau Pantu, Kampung Tanjung Bijat, SK Basi, Kampung Klauh sereta area Tabut, Skrang enggau Kejemut dipelaba napi penusah bah nyema ujan bangat majak nyadi.

Pemesai Penyaga Menua Pelilih Sri Aman Kapten Huzaimah Ibrahim nangkan mensia mayuh ke diau ba kandang menua nya patut lansik beratika sebarang jaku tangkan ketegal ujan bangat lebih agi sida ke diau ba kandang menua ke baruh.

Ku iya, tu bekau ari tangkan gaya hari ke udah dipansutka Opis Pengemata Gaya Hari Malaysia urung pukul 2.00 lemai kemari lalu minta mensia mayuh seruran bejejaga enggau sebarang penusah enda disadang.

“Nyema ujan majak nyadi lalu bisi genturung pendiau dituntung penusah, nyadi patut lengkas madah ngagai piak bekuasa minta sah.
“Berebak enggau nya pendingka gerah sepanjai maya. Nyema diasuh mindah ngagai endur ke likun, anang enda nitih,” ku iya maya dirandau kemari.

Iya madah, semua dokumen ke beguna patut ditaruh ba endur ke likun sereta mudah dijapai.

Nitih penerang ari Opis Pengemata Gaya Hari, tangkan bekaul enggau gaya hari dipelaba terus betampung.

Di Sarawak, ujan bangat dipelaba nyadi ba Kuching, Serian, Samarahan, Sri Aman, Betong, Sarikei, Sibu, Mukah enggau Kapit (Song).

Tandu Huzaimah, Raban Penyaga Menua Malaysia (APM) Pelilih Sri Aman ngerikodka semila sitak dikeruga ketegal ujan bangat enggau ai pasang raya sepanjai 2019.

Entara nya, Taman Tiara, Jalai Berjaya, Jalai Batang Lupar (sitak Kampung Resak), Jalai Pasir Panas, sitak rumah panjai Kejemut, Skrang enggau Tembong, San Munggor, Kampung Pangkat Stumbin, Jalai Kejatau-Lingga, Kampung Taba, Tanjung Bijat, Jalai Pantu-Semawa, Jalai Isu Gayau enggau Kampung Kemintin Tengah, Sungai Klauh.

Suara Sarawak