KM9 Jalai Ng Merit-Sangan tekerap

TATAU: Mensia mayuh ditangkan bejimat lebuh betengahka jalai ba Kilometer 9, Jalai Nanga Merit-Sangan ketegal penusah jalai merekah Hari Dua tu tadi.

Ketuai Polis Pelilih Tatau, DSP Dennis Bunyam madahka, penusah jalai merekah tu nyadi berindik ari penusah tanah tekerap sereta diumbaka ujan.

“Jalai belakin ke merekah tu sepenyauh 50 meter enggau dua kaki penalam.

“Aku ngarapka semua kitai betengahka jalai tu bela bejimat enggau nyaga pengelikun diri kelebih agi maya malam hari,” tandu iya.

Iya mansutka penerang tu ngagai Suara Sarawak di Bintulu tadi.

Ku iya, Opis Kereja Raya (JKR) udah ngasuh kontraktor ngentakka papan tanda ‘AWAS’, api penerang maya malam enggau tali nyaga pengelikun ba sepemanjai jalai ke merekah nya.

“Taja pia, jalai tu agi ulih ditengah ketegal bisi jalai ke ngerambing nya dibuka baru seraya nganti jalai merekah diseleti,” ku iya.

Ungkup penerang ku DSP Dennis, urung 300 buah entukar nengah jalai nya ninting hari lalu bisi 10 ribu iku mensia nguan menua nya ti datai ari menua Ulu Anap, Nangan Merit enggau Pasar Sangan Tatau.

BEJIMAT….Ketuai Polis Pelilih Tatau nangkan mensia mayuh ke nengah jalai KM9, Jalai Nanga Merit-Sangan bejimat lebuh nengah jalai nya.
 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak