Nyerungkai pengelebih teknologi drone

Kuching Skills College (KSC)

KUCHING: Kuching Skills College (KSC) diatu nyingkang ke mua nyerungkai teknologi baru ti bisi pengulih besai ngeranchakka pemansang industri betanam betupi menua tu.

Kenu ku Ketuai Pemesai Eksekutif iya, Novert Sullang, sida bisi amat pengandal teknologi drone ulih nyaup pengawa ngemansangka industri bekaul nengah lapan pengelebih dikembuan teknologi nya.

Ku iya, tu nyengkaum dikena matau utai tanam (Crop Monitoring), meresa pengami tanah (Soil Assessment), nemu bagi bansa utai tanam ke engkeman ditanam ba tanah nya (Plant Emergence & Population), bansa sum (Fertility), chara ngintu utai tanam (Crop Protection), Insuran (Insurance), sistem parit enggau entali ai (Irrigation & Drainage) enggau perambu ngetau (Harvest Planning).

“Ngelama tu kitai suah ninga teknologi drone tu dikena ngambi gambar ba dandang besai, nimpai ari langit ngambika utai terang sereta tinjau jauh agi.

RUNDING DEKA MAJU… CEO KSC, Novert Sullang

“Ari pengelebih tu, dia kitai teulihka runding drone tu ulih dikena ba pengawa betanam betupi nentuka asil enggau kualiti utai tanam manah agi.

“Nya alai KSC ngerebut peluang ke bisi ba pengelebih kededua industri; betanam betupi enggau teknologi drone, dikena nempa modal mensia ti bepengelandik enggau bepenau,” terang Novert.

Serak tu Novert mai kitai nemu silik agi pasal empat chara teknologi drone mai revolusyen ba industri betanam betupi menua tu nengah kus ke bisi disedia sida.

“Kitai deka bejurai silik pasal guna teknologi drone ba renggat pengawa industri ke alai teknologi tu diatu dikemeran ba mayuh bengkah industri kelebih agi ba pengawa betanam betupi.

“Kebuah pia laban raban industri beratika teknologi tu ngasi dikena kelimpah ulih ngelimat belanja, kereja lanchar enggau meruan. Uji kitai bela berati baka ni drone tu ngubah rampa industri betanam betupi,” ku iya.

UNGKUP PENERANG… Novert nerang pasal pengelebih drone rambau Drone Tecnology: Guide to Career Advancement & Entrepreneurship Course ba Begunan Lama Dun ditu.

NGAGA KAR

Keterubah, ngena teknologi drone tu kitai ulih ngaga kar. Enti suba, jarang endar kitai meda orang bumai enggau pekebun ngaga kar.

Ba runding sida, kar tu semina masau belanja laban enda ulih nentuka pemayuh asil utai tanam dipansut umai enggau kebun sida.

Taja pia, tu nyadi sebagi ari pengawa beguna amat diatu nentuka pemujur utai dikereja kitai sereta naga pemayuh asil ari dijir pun tauka utai tanam ti berurun.

Kar tu dikena kitai merambu maya nijir utai tanam ngambi ulih nyapai kapasiti optimum lalu ulih nyapai tikas maksimum penyampau asil diketau.

Drone ulih dikena meda gaya rampa menua ba dandang kebun sereta meresa pengami tanah tauka tanah ngundan kerangan.

Pekara tu mega beguna amat nentuka nadai awak tanah ti puang ba dandang kebun kelimpah beratika alir ai, gaya ngerachun indu utai enggau ngesum sereta ngemuntangka pengawa ngetau.

MENIH

Sekeda orang bumai enggau serikat bepelasarka industri betanam betupi udah berengkah ngena enggau ngemeranka teknologi drone ba pengawa menih.

Tu berindik ari Unmanned Aerial Vehicle (UAV) ulih ngereja pengawa menih ti meruan nengah chara nabur benih ti berurun agi enggau tinggi agi penyampau utai ulih dikereja.

Reti iya, drone tu enda ibuh dikemudi orang tang semina dipatau ari ‘remote’ ti udah ditetap ungkup sebengkah pengawa nyengkaum menih leka utai tauka paung utai tanam.

Nya alai, kitai ulih ngelimat belanja ari sukut gaji pengereja kelimpah ngelimat jam kereja ba tanah bedandang besai, terang Novert silik.

MATAU UTAI TANAM

Bekenaka drone tu kitai ulih matau utai tanam baka sawit enggau padi beselang hari sepanjai timpuh iya tumbuh besai laban timpuh tu beguna amat nentuka iya tumbuh galak enggau nadai utai ngachau.

Kitai mega ulih ngelala sebarang penanggul nyadi ba utai tanam baka dirampit penyakit, sengat indu utai tauka kurang nutrient tauka ai enggau utai bukai ti tau ngasuh utai tanam tejanggal.

Ngelala igi penyakit ke tau berampit tauka penanggul bukai ba utai tanam beguna amat ngagai raban bumai enggau pekebun ngambika sida ulih nagang enggau nyeleti dikena nyeliahka penanggul nya ari ngelekai sereta ngerampit utai tanam ke bukai.

Pengawa tu ulih dikereja drone enggau ngelala spektrum penampak (cahaya) ti diserap enggau dipantul daun utai tanam. Chara tu dikumbai Normalised Difference Vegetation Index (NDVI).

Penerang NDVI ditangkap kemera ti diambi ulih ngempung gelumbang penampak dalam tauka semak ngagai kategori inframerah.

Tu bepanggai ba pekara nyata ke alai utai tumbuh ti galak deka menyerap gelumbang penampak enggau mantulka penampak inframerah. Makin galak utai tanam, makin mayuh penampak inframerah dipantul.

KEREBAN MANCHIT, NGESUM

Pengawa bekenaka drone nyadi kereban dikena manchitka ai rachun enggau sum diatu udah nyilih chara lama dikena ngerachun enggau ngesum.

Enti suba, sida ngema tung pemanchit ti ngundan rachun ke udah dilumai enggau ai sereta ngesum ngena jari, ari pun siti ngagai pun siti dataika tembu.

Chukup pengiruh, lelak sereta mayuh masau belanja enggau jam gawa kelimpah tau endar ngachau pengerai.

Nya alai, ngena teknologi drone tu dipeda ngasi amat kelebih agi ba umai enggau kebun bedandang besai baka sawit.

Mayuh udah bukti madahka pengawa manchit ngena chara lama besai agi belanja sereta enda sikar dibida enggau drone. Manchit chara lama tau ngasuh pengawa ti patut dirumban deka tejanggal.

Ambika chunto lebuh tangkai padi rusak kena penyakit ngujungka pun padi enda galak sereta penyakit ngerampit pun padi ke bukai.

Tambah mega, kitai irauka pengerai bala pengereja ti ngerachun laban kelalu lama nyium bau rachun ti tau ngeruga pengerai sida.

INISIATIF KSC

Berindik ari nya ku Novert, sida ba KSC meransang rebak baru nadai ngira renggat umur nguasa penemu enggau penau ba teknologi baru tu ngambika sida ulih tetangkupka peminta makit kereja nipakka pemansang industri dunya kemaya hari.

Kebuah pia laban teknologi drone tu majak inovatif sereta maju ninting hari nitihka peneras arus dunya mansang nuju Revolusyen Industri 4.0 (IR 4.0) nunda menua maju bukai.

Kitai ngadang dudi hari, pengawa tauka kereja ti begunaka pengereja tau disilih sistem otomatik asil integrasyen begulai enggau drone. Nya kebuah kitai enda tau enda nyikap diri berengkah ari diatu.

Setipikit Pengelandik Ngena Drone nengah program sekularship mega bisi disediaka KSC ungkup nembiak lepas peresa Penilaian Tahap Tiga (PT3) enggau Sijil Pelajaran Malaysia (SPM).

PROGRAM SEKULARSHIP TEKNOLOGI DRONE

Kitai melabaka lebih 100,000 batang pengawa bekaul enggau drone deka menuhka makit kereja selampur dunya kandang beberapa taun deka datai.

Tu seriris enggau pemansang tekonologi drone ti matak mayuh macham pengelandik nyengkaum robotic, pemansang software, servis penerang drone, Artificial Intelligence (AI) enggau mekanikal injiniring.

Sekeda ari bansa program setipikit dikena ngenegapka ekonomi dunya drone disediaka KSC iya nya Certified Drone Precision Agriculture Proficient™ (Cdpap) enggau Certified Drone Aerial Mapping And Surveying Proficient™ (Cdasp).

“Tu mega nyengkaum Certified Drone Inspection Proficient™ (Cdip), Certified Drone Maintenance And Repair Proficient™ (Cdmr) enggau Certified Drone Data Services (Data Analytics And Ai) Proficient™ (Cdas).

“Sebarang tanya enggau penerang silik pasal KSC enggau program bisi disedia tau whatsapp ngagai lumur 012 – 2544066 tauka 012 – 433 5066.

“Mayuh peluang ulih diserungkai nengah inisiatif dipejalaika kami nyaup menua Sarawak nyapai status menua bepenatai pemisi tinggi datai ba taun 2030,” ku Novert madah nyemetak.

Ungkup penerang, KSC mega nempa nama ba program kulinari ke alai bala nembiak deka disikap ngena penemu sentang pengelandik kulinari enggau dagang.

Bala nembiak deka nerima latih kulinari iya nya 80 peratus belajar ari praktikal seraya 20 peratus agi belajarka teori enggau pengelandik dagang.

Apin lama ke udah, nengah Program Outreach keterubah ba taun 2020, KSC udah ngenataika licha pasal kus bisi disedia ba mua lebih 300 iku nembiak Sekula Sekondari (SMK) Matang Jaya ditu.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak